صرف نوکری ہی نہیں جائے گی، آپ کو جیل بھی جانا پڑے گا:شوبھندو

کولکتہ: اب ایڈوائزری نہیں، بلکہ ایکشن چاہیے۔ الیکشن کمیشن کے اقدامات پر عدم اطمینان کا اظہار کرتے ہوئے قائد حزب اختلاف شبھیندو ادھیکاری نے یہ مطالبہ کیا ہے۔ آج انہوں نے واضح طور پر کہا کہ انہیں الیکشن کمیشن کے خلاف شکایت ہے۔ ساتھ ہی انہوں نے ای آر او (ERO) اور اے ای آر او (AERO) کو بھی سخت پیغام دیا ہے۔ شبھیندو نے کہا، ”الیکشن کمیشن کو مکمل اختیار ہے کہ وہ براہ راست معطل کرے اور ایف آئی آر (FIR) درج کرے۔ انہوں نے بہت شرافت سے اس حکومت کو کارروائی کرنے کے لیے کہا تھا، لیکن کمیشن نے خود کچھ نہیں کیا۔ الیکشن کمیشن کو چاہیے کہ وہ براہ راست ایکشن لے۔ بہت ہو چکا، اب وہ کارروائی کریں۔“ اس کے بعد کمیشن کو مخاطب کرتے ہوئے شبھیندو کا پیغام تھا، ”اب مزید کسی ایڈوائزری کے چکر میں نہ رہیں، آپ کے پاس مکمل اختیار ہے ایف آئی آر درج کرنے اور معطل کرنے کا۔ ایکشن شروع کریں۔“دوسری طرف، ترنمول لیڈر تنمے داس نے کہا، ”قانون کے مطابق جو بھی کرنا ہے، ریاستی حکومت کی جانب سے چیف سکریٹری یقیناً کریں گے۔ لیکن یہاں سیاست کا کوئی معاملہ نہیں ہے۔ پارٹی کی جانب سے تبصرہ کرنے کی بھی کوئی گنجائش نہیں ہے۔“ بات یہیں ختم نہیں ہوئی، شبھیندو نے ای آر او اور اے ای آر او کو مخاطب کرتے ہوئے کہا، ”آپ لوگ یہ سب نہ کریں۔ اگر آپ غیر قانونی طور پر کام کرتے ہیں تو اس کی ذمہ داری آپ کی ہوگی۔ اروند مینا سمیت جو ڈی ایم (DM) آپ کو مشورے دے رہے ہیں، ان کی آڈیو اب پورٹلز پر گردش کر رہی ہے۔ وہ بی ڈی او اور ایس ڈی او کو کیا کہہ رہے ہیں، سب سامنے آ رہا ہے۔ اس لیے میں ای آر او اور اے ای آر او سے کہوں گا کہ ڈی ایم کے کسی بھی حکم پر ورچوئلی عمل نہ کریں۔ تحریری آرڈر کے بغیر کچھ نہ کریں۔ صرف نوکری ہی نہیں جائے گی، بلکہ آپ کو جیل میں بھی رہنا پڑے گا۔“

Source: PC- tv9bangla