شیاما پرساد کا خواب پورا کرتے ہوئے شبھیندو بنگال کے نویں وزیر اعلیٰ بن گئے

شیاما پرساد کا خواب پورا کرتے ہوئے شبھیندو بنگال کے نویں وزیر اعلیٰ بن گئے انتظار ختم ہوا۔ بریگیڈ کے ایک عظیم الشان جلسے میں شبھیندو ادھیکاری نے ریاست کے نویں وزیر اعلیٰ کے طور پر حلف اٹھا لیا۔ گیروا لباس میں ملبوس شبھیندو کو گورنر آر این روی نے حلف دلایا۔ ان کے ساتھ کابینہ کے ارکان کے طور پر دیلیپ گھوش، اگنیمترا پال، اشوک کیرتنیا، نشیتھ پرامانک اور خودی رام ٹوڈو نے بھی حلف اٹھایا۔ حلف برداری کی اس تقریب کے لیے بریگیڈ کے میدان کو روایتی بنگالی انداز میں سجایا گیا تھا۔ کیرتن، چھو رقص، باول گیت اور دھامسا مادول کی تھاپ سے پورا ماحول گونج اٹھا، جبکہ اسٹیج پر رابندر ناتھ ٹیگور کی تصویر کے ساتھ دکھنیشور مندر اور ماں درگا کی تصاویر کا کولاج لگایا گیا تھا۔ بریگیڈ کا پورا میدان 'جے شری رام' کے نعروں سے گونج رہا تھا۔ اس تقریب میں کئی اہم شخصیات نے شرکت کی۔ اسٹیج پر شیاما پرساد مکھرجی کے آخری سفر کے ساتھی سلیگوڑی کے ماکھن لال سرکار بھی موجود تھے۔ ماکھن لال سرکار کو اس وقت کی کانگریس حکومت نے دہلی میں حب الوطنی کے گیت گانے پر گرفتار کیا تھا۔ نریندر مودی نے اسٹیج پر ان کی عزت افزائی کی اور ان کے پاوں چھو کر آشیرواد بھی لیا۔ شبھیندو ادھیکاری بنگال کی سیاست کا ایک اہم چہرہ رہے ہیں۔ بائیں بازو کے دورِ حکومت میں وہ نندی گرام تحریک کا مرکزی چہرہ تھے۔ سیاسی حلقوں کا ماننا ہے کہ نندی گرام تحریک ہی بائیں بازو کی حکومت کے خاتمے کی بڑی وجہ بنی۔ شبھیندو نے مسلسل جدوجہد کے ذریعے سیاست میں اپنی جگہ بنائی اور گزشتہ اسمبلی انتخابات میں ممتا بنرجی کو نندی گرام کی سرزمین پر شکست دی۔ اس بار وہ نندی گرام کے ساتھ ساتھ بھوانی پور میں بھی ممتا بنرجی کے خلاف امیدوار تھے اور انہوں نے ممتا کو ان کے گھر میں ہرانے کا دعویٰ کیا تھا۔ آخر کار ترنمول حکومت کا خاتمہ ہوا اور بی جے پی 207 نشستیں جیت کر پہلی بار ریاست میں برسرِ اقتدار آئی، جس کا سہرا شبھیندو ادھیکاری کے سر جاتا ہے۔ برطانوی دور میں مشرقی مدنی پور کی سرزمین سے ہی انگریزوں کے خلاف 'تامر لپتو حکومت' قائم ہوئی تھی اور دیش پران شاشمل اور ماتنگینی ہاجرہ جیسے انقلابیوں نے اپنی جانیں قربان کی تھیں۔ اسی تحریک کی مٹی سے نکل کر شبھیندو ادھیکاری اب بنگال کے وزیر اعلیٰ بنے ہیں۔ شبھیندو اکثر یہ شکایت کرتے تھے کہ ترنمول کے دور میں وزیر اعلیٰ اور تمام اہم وزراءصرف کولکتہ اور گرد و نواح سے ہوتے تھے اور اضلاع کو نظر انداز کیا جاتا تھا۔ ان کی خواہش تھی کہ ریاست کا نظم و نسق اضلاع سے چلایا جائے، اور اب وہ خواب حقیقت بنتا نظر آ رہا ہے۔

Source: Social Media