سماعت کے دوران بزرگوں کو پریشان کئے جانے پر ابھیشیک بنرجی سخت ناراض

سماعت کے دوران بزرگوں کو پریشان کئے جانے پر ابھیشیک بنرجی سخت ناراض کولکاتا27دسمبر:ترنمول کانگریس کے جنرل سکریٹری ابھشیک بنرجی نے الیکشن کمیشن کی جانب سے ووٹر لسٹ کی تصحیح کے لیے جاری سماعتوں کے دوران بزرگ شہریوں کی مبینہ ہراسانی پر بی جے پی اور کمیشن کو سخت نشانہ بنایا ہے۔انہوں نے کہا کہ بی جے پی "بنگال مخالف" ہے اور ان کی سیاست صرف لوگوں کو نام خارج کرنے، مذہب اور توڑ پھوڑ کے گرد گھومتی ہے۔ابھشیک کے بقول: "بی جے پی کی فطرت ہی لوگوں کو لائنوں میں کھڑا کرنا ہے۔ الیکشن کمیشن کی سماعتوں کا کوئی منصوبہ نہیں ہے، وہ صرف وہی کر رہے ہیں جو بی جے پی کہہ رہی ہے۔"ابھشیک بنرجی نے چیلنج کیا کہ اگر ووٹر لسٹ میں 1 کروڑ 36 لاکھ تضادات (غلطیاں) ہیں، تو کمیشن ان کی فہرست عوامی کرے۔انہوں نے مزید کہا کہ اگر بی جے پی کا دعویٰ ہے کہ ایک کروڑ روہنگیا یا بنگلہ دیشی موجود ہیں، تو ان کی فہرست جاری کی جائے ورنہ بنگال کے عوام سے کان پکڑ کر معافی مانگی جائے۔ انہوں نے الزام لگایا کہ جو کام بی ایل او (BLO) ایک ماہ میں گھر گھر جا کر نہیں کر سکے، وہ ایک گھنٹے میں کیسے کر دیا گیا؟ابھشیک نے دعویٰ کیا کہ ان کے پاس 'سیما کھنہ' نامی خاتون کے چیٹ اسکرین شاٹس موجود ہیں، جس میں وہ تسلیم کر رہی ہیں کہ یہ سب سافٹ ویئر کی غلطی کی وجہ سے ہوا ہے۔ انہوں نے کہا کہ یہ تمام ثبوت سپریم کورٹ میں جمع کرائے جائیں گے۔انہوں نے واضح کیا کہ ممتا بنرجی کی حکومت کسی کو بچا نہیں رہی ہے، بلکہ شفافیت کا مطالبہ کر رہی ہے۔ ان کا سوال تھا کہ اگر فہرستیں درست ہیں تو انہیں عام کرنے میں کیا مشکل ہے؟

Source: Social Media