شراب کی محفل میں دو سمدھیوں کے درمیان جھگڑا، قتل میں تبدیل

شراب کی محفل میں دو سمدھیوں کے درمیان جھگڑا، قتل میں تبدیل کولکاتا 3مارچ :ہولی سے ایک رات پہلے شراب کے پیسوں پر دو سمدھیوں کے درمیان ہونے والی تکرار جان لیوا ثابت ہوئی! یہ واقعہ ندیہ کے ہرین گھاٹا، نگر اکھڑا مہادیو پور تلتلہ پاڑہ میں پیش آیا جس سے علاقے میں شدید سنسنی پھیل گئی ہے۔ مقتول کی شناخت 28 سالہ سنجیب دیوناتھ کے نام سے ہوئی ہے۔ معلوم ہوا ہے کہ سنجیب روزگار کے سلسلے میں ممبئی میں مقیم تھے اور بیس دن پہلے ہی چھٹیوں پر گھر آئے تھے۔ ہولی سے قبل سنجیب شراب کی ایک محفل میں گئے تھے، جہاں محض 100 روپے کے لین دین پر اپنے سمدھی کے ساتھ ان کی تلخ کلامی ہوئی۔ الزام ہے کہ سمدھی نے سنجیب کو پیٹ پیٹ کر قتل کر دیا۔ پولیس نے اس سلسلے میں اسیت دیوناتھ کو حراست میں لے لیا ہے۔پیر کی رات ساڑھے دس بجے کے قریب سنجیب دیوناتھ کے گھر کے پاس ایک نرسری کے باغ میں شراب کی محفل جمی ہوئی تھی۔ وہاں شراب خریدنے کے پیسوں کی تقسیم کے دوران محض 100 روپے کی بات پر سنجیب اور ان کے سمدھی اسیت دیوناتھ کے درمیان تکرار شروع ہوئی۔ یہ بحث دیکھتے ہی دیکھتے ہاتھا پائی میں بدل گئی۔ الزام ہے کہ غصے میں آکر اسیت نے ایک بیلچے سے سنجیب کے سر پر وار کر دیا، اور بعد میں بانس سے بھی ان کے سر پر حملہ کیا۔ خون میں لت پت سنجیب چیختے ہوئے موقع پر ہی گر پڑے۔

Source: Social Media