شبھیندو ادھیکاری مغربی بنگال کے اگلے وزیر اعلیٰ ہوں گے

شبھیندو ادھیکاری مغربی بنگال کے اگلے وزیر اعلیٰ ہوں گے جمعہ کے روز بی جے پی کے تمام 207 نو منتخب ارکان اسمبلی کے ساتھ میٹنگ کے بعد، مرکزی وزیر داخلہ امت شاہ نے باقاعدہ طور پر اعلان کر دیا ہے کہ شبھیندو ادھیکاری مغربی بنگال کے اگلے وزیر اعلیٰ ہوں گے۔نیو ٹاون کے 'بشور بنگلہ کنونشن سینٹر' میں ہونے والی اس میٹنگ میں شبھیندو ادھیکاری کے نام کی آٹھ تجاویز پیش کی گئیں۔ امت شاہ کے مطابق، دوسرے نام کے لیے کافی وقت دیا گیا تھا، لیکن کوئی دوسرا نام سامنے نہیں آیا۔ لہٰذا، شبھیندو ادھیکاری کو متفقہ طور پر پارلیمانی پارٹی کا لیڈر منتخب کر لیا گیا۔ اس انتخابی عمل کی نگرانی خود امت شاہ اور اوڈیشہ کے وزیر اعلیٰ موہن چرن ماجھی نے بطور مبصر کی۔بی جے پی کی جانب سے انہیں اس منصب کے لیے موزوں ترین قرار دینے کی بڑی وجوہات یہ ہیں: شبھیندو ادھیکاری نے مسلسل دوسری بار ممتا بنرجی کو انتخابی میدان میں شکست دی ہے۔ 2021 میں نندی گرام کے بعد، اب 2026 میں انہوں نے ممتا بنرجی کو ان کے اپنے گڑھ بھوانی پور میں 15 ہزار سے زائد ووٹوں کے فرق سے شکست دے کر اپنی سیاسی طاقت ثابت کی۔ ارکان اسمبلی کی حمایت حاصل کرنے کے بعد، شبھیندو ادھیکاری اب راج بھون جا کر گورنر آر این روی سے ملاقات کریں گے اور باقاعدہ طور پر حکومت سازی کا دعویٰ پیش کریں گے۔کل یعنی سنیچر کو کولکتہ کے تاریخی بریگیڈ پریڈ گراونڈ میں حلف برداری کی تقریب منعقد ہوگی، جہاں وہ ریاست کے نئے وزیر اعلیٰ کے طور پر حلف لیں گے۔اس اعلان کے ساتھ ہی بنگال میں جاری سیاسی بے یقینی ختم ہو گئی ہے اور ریاست میں پہلی بار بی جے پی کی حکومت بننے کا راستہ مکمل طور پر صاف ہو گیا ہے۔

Source: Social Media