شانتی نکیتن کو لے کر کولکتہ میونسپل کارپوریشن نے ابھیشیک بنرجی کو نوٹس تھما دیا۔

وزیر اعلیٰ کے عہدے کا حلف لینے کے فوراً بعد ہی شبھیندو ادھیکاری نے واضح کر دیا تھا کہ کسی بھی غیر قانونی تعمیر کو بخشا نہیں جائے گا۔ ریاست کے کئی حصوں میں پہلے ہی بلڈوزر چل چکے ہیں۔ اب خود ترنمول کانگریس کے کل ہند جنرل سکریٹری ابھشیک بنرجی کے دو مکانات، 'شانتی نکیتن' اور کالی گھاٹ پر کارپوریشن کا نوٹس پہنچ گیا ہے۔ مکانات پر نوٹس چسپاں بھی کر دیے گئے ہیں۔ ان میں بتایا گیا ہے کہ اگر غیر قانونی تعمیرات کی گئی ہیں تو انہیں فوری طور پر گرایا جائے، ورنہ کارپوریشن کی طرف سے اسے مسمار کر دیا جائے گا۔ ہریش مکھرجی روڈ پر ایک عظیم الشان عمارت 'شانتی نکیتن' کھڑی ہے۔ ریاست کے تقریباً تمام لوگ اس محل نما مکان سے واقف ہیں۔ اس گھر میں ترنمول کے کل ہند جنرل سکریٹری ابھشیک بنرجی اپنی اہلیہ اور بچوں کے ساتھ رہتے ہیں۔ اس کے علاوہ ان کی کئی اور جائیدادیں بھی ہیں۔ 121 کالی گھاٹ روڈ پر بھی ایک مکان ہے، حالانکہ وہ ابھشیک کی والدہ لتا بنرجی کے نام پر ہے اور کالی گھاٹ روڈ کے اس مکان کو 'لیپس اینڈ باونڈز' کی جائیداد دکھایا گیا ہے۔ اب کارپوریشن کی نظریں بھوانی پور اسمبلی حلقہ کے وارڈ نمبر 73 میں واقع 121، کالی گھاٹ روڈ اور 188 اے ہریش مکھرجی روڈ والے مکانات پر ہیں۔ حال ہی میں کولکتہ میونسپل کارپوریشن نے ابھشیک کی ان جائیدادوں کی تفصیلات طلب کی تھیں۔ نوٹس میں کہا گیا ہے کہ ان دونوں پتوں پر موجود تعمیرات میں کچھ حصے نقشے کے خلاف (غیر قانونی) بنے ہوئے ہیں۔ اس کے ساتھ ہی یہ بھی پوچھا گیا ہے کہ اگر کوئی اضافی تعمیر کی گئی ہے، تو کیا اس کے لیے کارپوریشن سے اجازت لی گئی تھی؟

Source: PC-anandabazar