سعودی عرب میں موجود بیٹے کو لے کر کٹوا کا خاندان پریشان

کولکاتا2مارچ :امریکہ اور اسرائیل نے ایران پر حملہ کیا ہے، جس کے جواب میں ایران کے مسلسل حملوں سے اس وقت مشرق وسطیٰ کے مسلم ممالک لہو لہان ہیں۔ مشرق وسطیٰ اس وقت مکمل طور پر جنگ کی لپیٹ میں ہے اور سعودی انتظامیہ نے پہلے ہی ایمرجنسی الرٹ جاری کر دیا ہے۔ اس صورتحال نے مغربی بردوان کے کئی خاندانوں کو شدید تشویش میں مبتلا کر دیا ہے، جن کے پیارے سعودی عرب میں پھنسے ہوئے ہیں۔ اس وقت فضائی حدود بند ہونے کی وجہ سے ان کی واپسی کے حوالے سے شدید غیر یقینی صورتحال پیدا ہو گئی ہے۔ اگرچہ ابھی تک موبائل فون کے ذریعے رابطہ بحال ہے، لیکن صورتحال مزید بگڑنے کے خوف نے سب کو ہراساں کر دیا ہے۔ کٹواکے نیاچر گاوں کے رہائشی وشواناتھ منڈل اور چمپا دیوی اپنے اکلوتے بیٹے راہول کے لیے شدید فکر مند ہیں۔ راہل اس وقت سعودی عرب میں ہیں جہاں انتظامیہ نے شہریوں کو محفوظ مقامات پر منتقل کرنا شروع کر دیا ہے۔ جنگ کی وجہ سے تمام پروازیں منسوخ ہیں اور راہول وہاں پھنس کر رہ گئے ہیں۔ راہول نے فون پر بتایا کہ "اگرچہ میزائل حملے میرے مقام سے کچھ دور ہو رہے ہیں، لیکن جس 287 منزلہ عمارت میں میں کام کر رہا ہوں، وہ اس علاقے کا سب سے اونچا واچ ٹاور ہے۔ سنا ہے کہ دشمن بڑی عمارتوں کو ہی نشانہ بنا رہا ہے، اس لیے میں بہت خوفزدہ ہوں۔" والدین نے حکومتِ ہند سے اپیل کی ہے کہ ان کے بیٹے سمیت تمام پھنسے ہوئے شہریوں کو فوری واپس لایا جائے۔ صرف راہل ہی نہیں، بلکہ اسی گاوں کی ببیتا اور ان کے شوہر راکیش شرما (پیشہ کمپیوٹر انجینئر) بھی سعودی عرب میں مقیم ہیں اور میزائلوں کی آوازوں کے درمیان خوف کے سائے میں دن گزار رہے ہیں۔ اسی طرح منگل کوٹ کے دھارسونا گاوں کے ریپن شیخ بھی پانچ ماہ قبل روزگار کے سلسلے میں وہاں گئے تھے اور اب ان کا خاندان مقامی ایم ایل اے سے مدد کی اپیل کر رہا ہے۔ کاٹوا کے وجے نگر کا ایک جوڑا بھی وہاں پھنس گیا ہے اور سبھی شدت سے وطن واپسی کی راہ تک رہے ہیں۔

Source: PC- sangbadpratidin