ہفتہ کو بریگیڈ گراونڈ میں نئی حکومت کی حلف برداری کے لیے سیکیورٹی کے سخت ترین انتظامات

اب صرف دو دن باقی ہیں۔ اس کے بعد بنگال کا انتظامی اقتدار باضابطہ طور پر بی جے پی کے ہاتھوں میں چلا جائے گا۔ ہفتہ کو تاریخی بریگیڈ گراونڈ میں بنگال کی نئی حکومت کی کابینہ کی حلف برداری کی تقریب منعقد ہوگی۔ اس تقریب میں نریندر مودی، امت شاہ سمیت بی جے پی کے کئی مرکزی وزرائ اور بڑے رہنما شرکت کریں گے۔ حلف برداری کی تقریب کے حوالے سے بریگیڈ گراونڈ میں تیاریاں زور و شور سے جاری ہیں اور پورے میدان کو سیکیورٹی کے حصار میں لپیٹا جا رہا ہے۔ نئے وزیر اعلیٰ کی حلف برداری کے پیش نظر پولیس بریگیڈ میں سخت حفاظتی انتظامات کر رہی ہے۔ اس سلسلے میں بدھ کے روز لال بازار (کولکتہ پولیس ہیڈ کوارٹر) کے حکام نے ایک میٹنگ بھی کی۔ ذرائع کے مطابق بریگیڈ کی حفاظت کے لیے تقریباً چار ہزار پولیس اہلکار تعینات کیے جا رہے ہیں۔ سیکیورٹی سسٹم کو مضبوط بنانے کے لیے پورے بریگیڈ گراونڈ کو 30 سیکٹرز میں تقسیم کیا گیا ہے۔ ہر سیکٹر کی ذمہ داری ڈپٹی کمشنر یا اسسٹنٹ کمشنر رینک کے پولیس افسر کے پاس ہوگی۔ ان کے ساتھ متعدد انسپکٹرز، سب انسپکٹرز، اے ایس آئی اور کانسٹیبل بھی موجود ہوں گے۔ اس کے علاوہ، ضرورت پڑنے پر بریگیڈ میں مرکزی فورسز (نیم فوجی دستوں) کے جوانوں کو بھی تعینات کیا جا سکتا ہے۔ پورے بریگیڈ گراونڈ کی سیکیورٹی کی مجموعی ذمہ داری ایڈیشنل پولیس کمشنر اور جوائنٹ پولیس کمشنر رینک کے افسران کے سپرد کی گئی ہے۔

Source: PC-sangbadpratidin