سرسونا میں بم کی خبر سے پورے علاقے میں سنسنی پھیل گئی

کولکتہ کی سٹی سیشن کورٹ میں منگل کی دوپہر بم کی دھمکی سے پیدا ہونے والے خوف و ہراس کے درمیان یہ بات سامنے آئی ہے کہ گزشتہ رات شہر کے دوسرے کونے میں واقع سرسونا میں بھی بم کی موجودگی کی خبر سے سنسنی پھیل گئی تھی۔ پیر کی رات سرسونا میں مقامی باشندوں نے بم جیسی ایک مشتبہ چیز پڑی ہوئی دیکھی، جس سے علاقے میں دہشت پھیل گئی۔ اطلاع ملتے ہی پولیس موقع پر پہنچی اور بم ڈسپوزل اسکواڈ کو بھی طلب کیا گیا۔ بم اسکواڈ کے ارکان نے اس مشتبہ چیز کو انسانی آبادی سے دور ایک دوسری جگہ منتقل کر دیا۔ یہ واقعہ پیر کی رات تقریباً ساڑھے 11 بجے پیش آیا۔ سرسونا کے رکشت پاڑہ لین کے باشندوں نے اس مشتبہ چیز کو دیکھ کر پولیس کو اطلاع دی تھی۔ بم کی شکل کی چیز پڑے ہونے کی وجہ سے اہل علاقہ شدید خوف زدہ ہو گئے تھے۔ سرسونا تھانے کی پولیس اور بم اسکواڈ نے موقع پر پہنچ کر اس چیز کا معائنہ کیا۔ بعد ازاں بم اسکواڈ کے ارکان اس بم نما شے کو وہاں سے ہٹا کر لے گئے۔ حکام اب اس بات کی جانچ کر رہے ہیں کہ وہ مشتبہ چیز اصل میں کیا تھی، وہ اس علاقے میں کیسے پہنچی اور اسے کس نے وہاں پھینکا۔ پولیس ذرائع کے مطابق، واقعے کی تحقیقات کے لیے آس پاس کے علاقوں کی سی سی ٹی وی فوٹیج کا جائزہ لیا جا رہا ہے۔ تاہم، انتخابات سے قبل اس طرح کی مشتبہ اشیائ کی برآمدگی نے مقامی لوگوں میں تشویش پیدا کر دی ہے۔ پولیس اس پہلو پر بھی غور کر رہی ہے کہ اس واقعے کے پیچھے کسی سماج دشمن گروہ کا ہاتھ تو نہیں ہے۔ دوسری جانب، منگل کو کولکتہ کی سٹی کورٹ میں بم کی دھمکی ملنے کے بعد وکلائ عدالت چھوڑ کر باہر نکل آئے۔ پولیس نے پورے عدالتی احاطے کی تلاشی لی، تاہم دوپہر ڈھائی بجے تک وہاں سے کوئی مشتبہ چیز برآمد نہیں ہوئی۔

Source: PC- anandabazar