ریت اور کوئلہ اسمگلنگ کی تحقیقات، بنگال اور دہلی میں ای ڈ ی کے چھاپے

کولکاتا: ڈائریکٹوریٹ آف انفورسمنٹ (ای ڈی) نے منگل کے روز ریت اور کوئلے کی مبینہ اسمگلنگ کے معاملات کی تحقیقات کے سلسلے میں مغربی بنگال اور دہلی میں ایک ساتھ کئی مقامات پر چھاپے مارے۔ سرکاری ذرائع نے یہ اطلاع دی۔ ذرائع کے مطابق، مرکزی مسلح فورسز کی مدد سے ای ڈی کی ٹیموں نے صبح تقریباً ساڑھے چھ بجے دہلی، کولکاتا، آسن سول، درگاپور اور ضلع مغربی بردھمان کے دیگر علاقوں میں مختلف ٹھکانوں پر تلاشی مہم شروع کی۔ جن مقامات پر تلاشی لی گئی، ان میں آسن سول کے بدبد پولیس تھانے کے نو تعینات اسٹیشن انچارج (او سی) منورنجن منڈل کی رہائش گاہ بھی شامل ہے۔ ایک سینئر افسر نے بتایا، “یہ تلاشی کارروائیاں غیر قانونی ریت اور کوئلہ تجارت کے معاملے کی تحقیقات سے جڑی ہوئی ہیں۔” منڈل کو گزشتہ سال بدعنوانی کے الزامات کے بعد معطل کر دیا گیا تھا، اس وقت وہ بارابانی پولیس تھانے میں تعینات تھے۔ بعد ازاں انہیں آسن سول پولیس کی اسپیشل برانچ کے ساتھ منسلک کر دیا گیا تھا۔ تاحال انہوں نے بدبد پولیس تھانے میں باضابطہ طور پر چارج نہیں سنبھالا ہے۔ ای ڈی کی اس کارروائی کے بعد او سی کے طور پر ان کی حالیہ تعیناتی بھی تفتیش کے دائرے میں آ گئی ہے۔ ایجنسی نے علاقے کے متعدد ریت اور کوئلہ تاجروں کے گھروں اور دفاتر پر بھی چھاپے مارے۔ درگاپور کے سیپکو علاقے میں ای ڈی نے ‘کے کے منرلز’ کے مالک اور ریت کے تاجر پربیر دتہ کے گھر اور ان کے بھائی امیت دتہ کی رہائش گاہ پر بھی تلاشی لی۔ حکام کے مطابق، یہ کمپنی بانکورہ، مغربی بردھمان اور مشرقی بردھمان اضلاع میں ریت کی کانیں چلاتی ہے، جبکہ اس کے دفاتر پاناغڑ میں واقع ہیں۔ اس کے علاوہ پاناغڑ میں ریت کے تاجر شیخ ہاشم مرزا بیگ، انڈل کے بھکتار نگر علاقے میں شیخ کرن منڈل اور پانڈابیشور میں کوئلہ تاجر شیخ مجھل کے گھروں پر بھی چھاپے مارے گئے۔ ذرائع نے بتایا کہ کولکاتا اور دہلی میں بھی کئی مقامات پر تلاشی کارروائی جاری تھی۔ واضح رہے کہ یہ معاملہ ای ڈی کی جانب سے زیرِ تفتیش ایک اور مبینہ کوئلہ گھوٹالے سے الگ ہے، جس کے تحت ایجنسی نے گزشتہ ماہ کولکاتا میں سیاسی مشاورتی کمپنی ‘آئی-پیک’ کے دفاتر پر چھاپہ مارا تھا۔

Source: social media