آر جی کر بدعنوانی کیس میں سندیپ گھوش کے خلاف آواز اٹھانے والے اختر علی کو جیل بھیج دیا گیا

آر جی کر میڈیکل کالج میں مالی بے ضابطگیوں کے الزامات لگانے والے سابق ڈپٹی سپرنٹنڈنٹ اختر علی کو اب خود اسی بدعنوانی کے کیس میں جیل کی ہوا کھانی پڑ رہی ہے۔ اختر علی نے ہی سابق پرنسپل سندیپ گھوش کو کٹہرے میں کھڑا کیا تھا، لیکن اب سی بی آئی کی تحقیقات میں ان کا نام بھی سامنے آیا ہے۔ اختر علی کے خلاف گرفتاری کا وارنٹ جاری ہوا تھا، جس کے بعد وہ منگل کو عدالت میں حاضر ہوئے۔ سی بی آئی نے عدالت میں ان کی جیل تحویل کی درخواست کرتے ہوئے کہا کہ اختر علی جان بوجھ کر تفتیش میں تاخیر کر رہے ہیں اور سمن کے باوجود حاضر نہیں ہو رہے۔ سی بی آئی کے وکیل نے طنزاً کہا، "میڈیا کو انٹرویو دیتے وقت وہ بالکل فٹ ہوتے ہیں، لیکن عدالت میں پیشی کے وقت بیمار ہو جاتے ہیں۔" دوسری طرف، سندیپ گھوش کے وکیل نے دعویٰ کیا کہ اس بدعنوانی کی جڑیں بہت گہری ہیں اور ان کے موکل کا اس میں کوئی کردار نہیں ہے۔ اختر علی کے وکیل نے ان کی خرابیِ صحت کا حوالہ دیتے ہوئے صفائی پیش کی، لیکن عدالت مطمئن نہیں ہوئی۔ دونوں فریقین کے دلائل سننے کے بعد جج نے اختر علی کو 17 فروری تک جیل بھیجنے کا حکم دیا۔ قابلِ ذکر ہے کہ اختر علی نے ہی سندیپ گھوش کے خلاف کئی سنگین الزامات لگائے تھے، لیکن سی بی آئی نے اپنی چارج شیٹ میں دعویٰ کیا ہے کہ اختر علی خود بھی اس مالی گھپلے میں ملوث ہیں۔ ہائی کورٹ نے پہلے ہی ان کی حفاظتی ضمانت کی درخواست مسترد کر دی تھی۔

Source: PC- anandabazar