رنگ دیکھے بغیر سخت کارروائی کریں!' انتخابی تشدد روکنے کے لیے شمیک بھٹاچاریہ کا چیف سیکرٹری کو پیغام

پیر کے روز مغربی بنگال اسمبلی انتخابات کے نتائج کے بعد ریاست میں اقتدار کی تبدیلی یقینی ہو گئی ہے، جہاں ترنمول کانگریس اقتدار سے باہر ہو چکی ہے اور بی جے پی واضح اکثریت کے ساتھ حکومت بنانے کی راہ پر گامزن ہے۔ تاہم، گنتی ختم ہوتے ہی پیر کی رات سے ریاست کے مختلف حصوں سے تشدد کی اطلاعات موصول ہو رہی ہیں۔ شہر سے لے کر اضلاع تک ترنمول کے پارٹی دفاتر میں توڑ پھوڑ، حملوں اور خونریز جھڑپوں کا سلسلہ رات بھر جاری رہا۔ان حالات کے پیشِ نظر بی جے پی کے ریاستی صدر شمیک بھٹاچاریہ نے انتخابی تشدد روکنے کے لیے سخت پیغام جاری کیا ہے۔ انہوں نے واضح کیا ہے کہ بنگال میں انتخابی تشدد کو کسی صورت برداشت نہیں کیا جائے گا اور صورتحال پر قابو پانے کے لیے سخت اقدامات کیے جائیں گے۔شمیک بھٹاچاریہ نے سخت انتباہ دیا ہے کہ اگر بی جے پی کا کوئی بھی کارکن یا حامی تشدد یا ہنگامہ آرائی میں ملوث پایا گیا، تو پارٹی اس کے خلاف سخت کارروائی کرے گی اور اسے پارٹی سے نکال دیا جائے گا۔چونکہ نئی حکومت کی حلف برداری تک انتظامیہ کی مکمل ذمہ داری چیف سیکرٹری کے پاس ہے، اس لیے شمیک نے ان پر زور دیا کہ وہ سیاسی وابستگی (رنگ) دیکھے بغیر شرپسندوں کے خلاف سخت قانونی کارروائی کریں۔انہوں نے کارکنوں سے اپیل کی کہ وہ جیت کا جشن امن و امان کے دائرے میں رہ کر منائیں اور کسی بھی قسم کی اشتعال انگیزی سے گریز کریں۔بی جے پی قیادت کا یہ مو¿قف ظاہر کرتا ہے کہ وہ حکومت سنبھالنے سے پہلے ہی ریاست میں امن و امان کی صورتحال پر اپنی گرفت مضبوط کرنا چاہتی ہے تاکہ سابقہ حکومتوں کے دور میں ہونے والے انتخابی تشدد کی روایت کو ختم کیا جا سکے۔

Source: PC-sangbadpratidin