نئی دہلی، 15 اپریل :انفورسمنٹ ڈائریکٹوریٹ (ای ڈی ) نے آج صنعت کار اور کانگریس کی جنرل سکریٹری پرینکا گاندھی واڈرا کے شوہر رابرٹ واڈرا سے ہریانہ میں زمین کے ایک سودے سے متعلق منی لانڈرنگ کے کیس کے سلسلے میں پوچھ گچھ کی یہاں ڈائریکٹوریٹ کے دفتر میں افسران نے مسٹر واڈرا سے شکوپور، ہریانہ میں زمین کی خریداری کے سودے سے متعلق کئی سوالات پوچھے ذرائع کے مطابق ڈائریکٹوریٹ کو اس سودے کے بارے میں کچھ نئی معلومات ملی تھیں اور مسٹر واڈرا سے اس سلسلے میں پوچھ گچھ کی جانی تھی۔ صحافیوں سے بات کرتے ہوئے صنعت کار واڈرا نے کہا کہ یہ کارروائی ’’انتقام کی سیاست‘‘ سے متاثر ہے ۔ انہوں نے کہا کہ ڈائریکٹوریٹ کو اس ڈیل میں کوئی بے ضابطگی نہیں ملی ہے اور یہ صرف انہیں ہراساں کرنے کے لیے کیا جا رہا ہے۔ انہوں نے کہا کہ ان کے پاس چھپانے کے لیے کچھ نہیں ہے اور ان کے پاس جو بھی معلومات تھیں وہ ڈائریکٹوریٹ کے حکام کے ساتھ شیئر کی گئی ہیں۔ انہوں نے حکام کو ہزاروں دستاویزات بھی دیے ہیں۔ انہوں نے کہا کہ یہ کیس کافی عرصے سے زیر التوا ہے، اس میں کوئی بے ضابطگی نہیں پائی گئی اور اسے بلاوجہ غیر ضروری طور پر طول دیا جا رہا ہے۔ مسٹر واڈرا نے کہا کہ جب بھی وہ لوگوں کے مفاد کی بات کرتے ہیں تو انہیں ڈرانے یا لوگوں کی توجہ ہٹانے کے لیے ایسے اقدامات کیے جاتے ہیں۔ صنعتکار واڈرا کو اس معاملے میں پہلے 8 اپریل کو طلب کیا گیا تھا، لیکن جب وہ ڈائریکٹوریٹ کے سامنے پیش نہیں ہوئے تو دوبارہ نوٹس بھیجا گیا۔ ہریانہ کے سابق وزیر اعلیٰ بھوپندر سنگھ ہڈا، جن کے دور میں یہ سودا ہوا، بھی کئی بار کہہ چکے ہیں کہ اس سودے میں کوئی بے ضابطگی نہیں ہوئی ہے۔ ی

Source: uni urdu news service