طیارے کے اندر برابر میں بیٹھی خاتون کے جسم کو مختلف جگہوں سے 'چھونے' کا الزام،

کولکتہ: طیارے میں تمام مسافر سوار ہو چکے تھے۔ ٹکٹ چیک کرنے کے بعد سب اپنی اپنی نشستوں پر بیٹھ گئے۔ اسی طرح بہار کا ایک رہائشی بھی طیارے میں سوار ہوا، جس کے برابر والی سیٹ پر ایک نوجوان خاتون بیٹھی تھیں۔ لیکن اس خاتون نے خواب میں بھی نہیں سوچا تھا کہ اس شخص کے برابر بیٹھ کر انہیں ایسے تجربے سے گزرنا پڑے گا۔ الزام ہے کہ اس شخص نے خاتون کے جسم کو مختلف جگہوں سے چھونا شروع کر دیا، جس کے بعد اسے گرفتار کر لیا گیا۔ معلومات کے مطابق، ایک نجی ایئر لائن کی کولکتہ آنے والی پرواز میں ایک خاتون سوار تھیں۔ جب طیارہ کولکتہ کی فضائی حدود میں تھا، تبھی برابر کی سیٹ پر بیٹھے بہار کے رہائشی نے مبینہ طور پر خاتون کو ہراساں کرنا شروع کر دیا۔ خاتون کا دعویٰ ہے کہ ملزم نے مختلف طریقوں سے ان کے جسم کو چھوا۔ اسی وقت خاتون نے طیارے کے اندر شور مچانا شروع کر دیا۔ پرواز میں موجود کیبن کریو (ایئر ہوسٹس وغیرہ) نے فوری طور پر اس مسافر کو وہاں سے ہٹا کر دوسری جگہ منتقل کر دیا۔ جیسے ہی طیارہ کولکتہ ہوائی اڈے پر اترا، عملے نے اس مسافر کو سی آئی ایس ایف کے حوالے کر دیا۔ بعد ازاں سی آئی ایس ایف نے اسے نیتا جی سبھاش چندر بوس انٹرنیشنل ایئرپورٹ تھانے کے سپرد کر دیا۔ گرفتار شخص کے خلاف خاتون کو ہراساں کرنے اور چھیڑ چھاڑ کے الزامات کے تحت مقدمہ درج کر کے اسے بیرک پور عدالت میں پیش کیا جائے گا۔ تاہم، طیارے کے اندر پیش آنے والے اس واقعے سے خاتون سخت خوفزدہ ہیں اور انہوں نے سیکیورٹی پر سوالات اٹھائے ہیں۔

Source: PC- tv9bangla