مغربی مدنی پور میں ریاست کی سب سے زیادہ غیر قانونی شراب ضبط کی گئی

انتخابات سے قبل مغربی مدنی پور میں ریاست کی سب سے زیادہ غیر قانونی شراب ضبط کی گئی ہے! اس وقت ریاستی سطح پر ناکہ بندی اور تلاشی کا عمل جاری ہے۔ انتخابی ریاستوں سے روزانہ کی بنیاد پر کچی شراب، غیر محسوب نقدی اور دیگر غیر قانونی اشیاءمرکز اور ریاست کی ایجنسیوں کے ذریعے برآمد کی جا رہی ہیں۔ یہ کارروائیاں الیکشن کمیشن کی ہدایت پر کی جا رہی ہیں۔ مغربی مدنی پور ضلع کے محکمہ آبکاری کے ذرائع کے مطابق، کچی شراب اور غیر قانونی طور پر فروخت ہونے والی شراب کی برآمدگی میں مغربی مدنی پور ضلع ریاست بھر میں سرفہرست ہے۔ مغربی مدنی پور ضلع کے محکمہ آبکاری کے ذرائع نے بتایا کہ انتخابی شیڈول کے اعلان کے بعد سے ضلع کے مختلف حصوں میں چھاپے مار کر بھاری مقدار میں غیر قانونی شراب اور دیگر سامان برآمد کیا گیا ہے۔ اس ضلع میں اب تک 1,329 مقدمات درج کیے جا چکے ہیں اور 90 افراد کو گرفتار کیا گیا ہے۔ کارروائی کے دوران 39,132 لیٹر کچی شراب، کچی شراب بنانے کا 4 لاکھ 92 ہزار 28 لیٹر خام مال، 363 لیٹر دیسی شراب، 493 لیٹر غیر ملکی شراب اور 850 لیٹر بیئر ضبط کی گئی ہے۔ اس کے ساتھ ہی 16 بائک اور دو گاڑیاں بھی قبضے میں لی گئی ہیں۔

Source: PC-anandabazar