حلف برداری کے وقت وزیر اعظم مودی، امیت شاہ اور بی جے پی کے تمام وزراءاعلیٰ موجود ہوں گے

ہفتہ کے روز بریگیڈ پریڈ گراونڈ میں نئے وزیر اعلیٰ کی حلف برداری کی تقریب منعقد ہوگی، جہاں بنگال کی پہلی بی جے پی حکومت اقتدار سنبھالے گی۔ اس تاریخی موقع پر وزیر اعظم نریندر مودی، وزیر داخلہ امت شاہ اور بی جے پی کے زیر اقتدار ریاستوں کے وزراءاعلیٰ سمیت کئی اہم شخصیات موجود ہوں گی۔تقریب کا آغاز صبح 10 بجے سے ہوگا اور یومِ رابندر ناتھ ٹیگور کی مناسبت سے اسٹیج پر صبح سے ہی رابندر سنگیت گونجے گا۔بریگیڈ کے داخلی راستوں کو بنگال کی ثقافت سے سجایا گیا ہے۔طویل تقریب کے پیشِ نظر مہمانوں کے لیے جھال مڑی اور رسگلے کے اسٹالز لگائے جا رہے ہیں۔ اسٹیج کو تین حصوں (ہینگرز) میں تقسیم کیا گیا ہے۔ درمیانی حصے میں گورنر حلف دلائیں گے، بائیں جانب وزیر اعظم اور دیگر ریاستوں کے وزراءاعلیٰ بیٹھیں گے، جبکہ دائیں جانب ریاست کی نئی کابینہ کے لیے جگہ مخصوص کی گئی ہے۔کولکتہ پولیس کے کمشنر اجے نندا نے سیکیورٹی کا جائزہ لیا ہے۔ تقریباً 4000 پولیس اہلکار تعینات ہوں گے اور پورے میدان کو 30 سیکٹرز میں تقسیم کیا گیا ہے۔سی سی ٹی وی کیمروں، ڈرونز اور بلند عمارتوں سے دوربینوں کے ذریعے نگرانی کی جائے گی۔میٹل ڈیٹیکٹرز کے ساتھ ساتھ ہیلی پیڈ کا انتظام بھی کیا گیا ہے۔محکمہ موسمیات نے ہفتہ کو کال بوشاکھی (طوفان) اور گرج چمک کے ساتھ بارش کی پیش گوئی کی ہے، جس میں ہوا کی رفتار 50 کلومیٹر فی گھنٹہ تک ہو سکتی ہے۔اس خطرے کے پیشِ نظر ڈیزاسٹر مینجمنٹ ٹیمیں الرٹ رہیں گی اور بارش کی صورت میں پانی نکالنے کے لیے اضافی پمپس کا انتظام کیا گیا ہے۔

Source: PC-sangbadpratidin