شمالی بنگال میں ایک بار پھر زلزلے کے جھٹکے محسوس کیے گئے ہیں۔

کولکتہ: شمالی بنگال میں ایک بار پھر زلزلے کے جھٹکے محسوس کیے گئے ہیں۔ دارجیلنگ اور جلپائی گوڑی میں ہلکا ارتعاش محسوس کیا گیا، جہاں ایک گھنٹے کے اندر دو بار زمین لرز گئی۔ ابتدائی معلومات کے مطابق، شمالی بنگال میں یہ جھٹکے سکم میں آنے والے زلزلے کے باعث محسوس کیے گئے ہیں۔ بار بار آنے والے ان جھٹکوں نے یہ سوال کھڑا کر دیا ہے کہ کیا یہ کسی بڑی تباہی کا پیش خیمہ ہیں؟ فروری کے آغاز سے ہی سکم میں مسلسل زلزلے آ رہے ہیں۔ ریاست کے مختلف حصوں میں اب تک تقریباً 39 بار جھٹکے محسوس کیے جا چکے ہیں، جن کی شدت ریکٹر اسکیل پر کبھی 3 اور کبھی 4 ریکارڈ کی گئی ہے۔ اتنے کم وقت میں پے در پے اتنے جھٹکے پہلے کبھی نہیں دیکھے گئے۔ سکم کے ان زلزلوں کے اثرات مغربی بنگال میں بھی دیکھے جا رہے ہیں، جہاں شمالی بنگال کے وسیع علاقوں میں لرزش محسوس کی گئی۔ بعض دنوں میں تو ایک ہی دن میں بارہ بار جھٹکے لگے۔ تازہ ترین اطلاعات کے مطابق، سکم کے گیلسنگ میں 4.6 شدت کا زلزلہ محسوس کیا گیا، جو صبح 11 بج کر 34 منٹ پر آیا۔ اس مرکزی زلزلے کے بعد سکم میں 5 آفٹر شاکس بھی محسوس کیے گئے۔ گزشتہ 20 دنوں میں اس ریاست میں 50 سے زائد بار زلزلہ آ چکا ہے۔ماہرین کا کہنا ہے کہ یہ 'فورس شاکس' ہو سکتے ہیں، جو کسی بڑے زلزلے سے پہلے محسوس کیے جاتے ہیں۔ یہ زلزلے ٹڈی دل کے جھنڈ کی طرح لگاتار آ رہے ہیں، جو مغربی بنگال کے لیے بھی ایک بڑے خطرے کی گھنٹی سمجھے جا رہے ہیں۔ اس صورتحال میں دوبارہ زلزلے کا آنا یقیناً تشویشناک امر ہے۔

Source: PC- tv9bangla