نوکری دلانے کے بہانے تقریباً 9 لاکھ 36 ہزار روپے کی دھوکہ دہی

کولکتہ کے علاقے سرشونہ میں نوکری دلانے کے بہانے تقریباً 9 لاکھ 36 ہزار روپے کی دھوکہ دہی کا معاملہ سامنے آیا ہے۔ متاثرہ خاندان نے سرشونہ تھانے میں ایف آئی آر درج کرائی ہے، جس میں ایک موٹر ٹریننگ اسکول کے انسٹرکٹر پر سب انسپکٹر کی نوکری دلانے کا جھانسہ دے کر رقم ہڑپنے کا الزام لگایا گیا ہے۔ واقعے کی تفصیلات کے مطابق، سرشونہ کی ایک خاتون جب گاڑی سیکھنے کے لیے موٹر ٹریننگ اسکول گئیں، تو وہاں ان کی ملاقات ٹرینر بشو ناتھ ساہا سے ہوئی۔ خاتون کا دعویٰ ہے کہ بشو ناتھ نے باتوں باتوں میں یہ یقین دہانی کرائی کہ اس نے کئی لوگوں کو سرکاری نوکریاں دلوائی ہیں۔ اس پر خاتون نے اپنے بے روزگار بیٹے کے لیے نوکری کی درخواست کی۔ الزام ہے کہ اس کے بعد انسٹرکٹر خاتون کو نیو علی پور کے ایس این رائے روڈ پر لے گیا اور وہاں سومین ساہا رائے نامی شخص سے ملوایا۔ پہلے کولکتہ پولیس میں کانسٹیبل کی نوکری کا وعدہ کر کے نقد اور آن لائن ذریعے سے تقریباً 6 لاکھ روپے لیے گئے۔ بعد میں ملزم نے کہا کہ کانسٹیبل کی تنخواہ کم ہے، اس لیے وہ سب انسپکٹر کی نوکری دلوا سکتا ہے، لیکن اس کے لیے مزید 3 لاکھ روپے درکار ہوں گے۔ خاتون نے اپنے بیٹے کے مستقبل کی خاطر اپنی زمین اور سسرال کی جائیداد بیچ کر یہ رقم جمع کی اور نقد ادا کی۔اس کے علاوہ امتحانی پرچہ فراہم کرنے کے نام پر مزید 36 ہزار روپے لیے گئے۔ طویل وقت گزرنے کے باوجود جب نوکری نہیں ملی اور رقم کی واپسی کا مطالبہ بھی پورا نہ ہوا، تو متاثرہ خاندان نے اتوار کو سرشونہ تھانے میں شکایت درج کرائی اور ڈی سی آفس میں بھی درخواست جمع کروائی۔ پولیس ذرائع کے مطابق واقعے کی تحقیقات شروع کر دی گئی ہے اور بشو ناتھ کی تلاش جاری ہے۔

Source: PC- tv9bangla