مغربی بنگال میں یکساں سول کوڈ نافذ کرنے کا فیصلہ، وزیر اعلیٰ شوبھندو ادھیکاری پیر کو اسمبلی میں بل پیش کریں گے

کلکتہ: مغربی بنگال کی بی جے پی حکومت ملک میں 'ایک قانون، ایک آئین' کی پالیسی کے تحت ریاست میں یکساں سول کوڈ (یو سی سی) نافذ کرنے جا رہی ہے۔ وزیر اعلیٰ شوبھندو ادھیکاری آنے والے پیر کو اسمبلی میں یہ اہم بل پیش کریں گے۔ اگر یہ بل پاس ہو جاتا ہے، تو مغربی بنگال یو سی سی نافذ کرنے والی ملک کی چوتھی ریاست بن جائے گا۔ جمعرات کی شام اسپیکر رتھیندر ا باسو کی صدارت میں ہوئی ایک اہم میٹنگ میں یہ فیصلہ لیا گیا کہ پیر کو اسمبلی سیشن کے دوسرے حصے میں 'یکساں سول کوڈ 2026' بل پیش کیا جائے گا۔ پیر کے دن کل 5 بل پیش ہونے ہیں، جن میں یو سی سی بل سب سے اہم ہے۔ اسمبلی ذرائع کے مطابق، اس قانون پر بحث کرنے کے لیے ایک گھنٹے کا وقت طے کیا گیا ہے۔ اس بحث میں وزیر اعلیٰ شوبھندو ادھیکاری اور اپوزیشن لیڈر ریتابرتا بنرجی سمیت دونوں طرف کے کئی بڑے لیڈران حصہ لیں گے۔ بتایا جا رہا ہے کہ جمعرات کی دوپہر تک اس بل کو لانے کا کوئی فیصلہ نہیں ہوا تھا، لیکن دوپہر کے بعد جیسے ہی وزیر اعلیٰ اسمبلی پہنچے، ان کی موجودگی میں بات چیت ہوئی اور شام کی میٹنگ میں اس بل کو پیر کے دن پیش کرنے کی حتمی منظوری دے دی گئی۔

Source: social media