مغربی بنگال انتخابات: الیکشن کمیشن کے مکمل بینچ کے دورے کے بعد تاریخوں کا اعلان ممکن

کولکتہ،6 مارچ : مغربی بنگال سمیت پانچ ریاستوں میں ہونے والے اسمبلی انتخابات کے شیڈول کا اعلان آئندہ ہفتے کے آغاز میں متوقع ہے ۔ یہ اشارہ مغربی بنگال کے چیف الیکشن آفیسر منوج اگروال نے جمعہ کے روز اس وقت دیا جب وہ راجیہ سبھا امیدواروں کے کاغذاتِ نامزدگی کی جانچ کی نگرانی کے لیے اسمبلی پہنچے تھے ۔ منوج اگروال نے صحافیوں سے گفتگو کرتے ہوئے بتایا کہ الیکشن کمیشن کی فل بینچ جلد ہی ریاست کی مجموعی صورتحال کا جائزہ لے گی۔ کمیشن کا اعلیٰ سطحی وفد 9 اور 10 مارچ کو کولکتہ میں قیام کرے گا۔وفد دیگر انتخابی ریاستوں کا دورہ مکمل کرنے کے بعد مغربی بنگال پہنچ رہا ہے ، جس کے بعد کسی بھی وقت انتخابی پروگرام کا باضابطہ اعلان کیا جا سکتا ہے ۔ ووٹر لسٹوں میں مبینہ بے ضابطگیوں کے سوال پر سی ای او نے کہا کہ انہوں نے تمام ضلعی حکام سے تفصیلی رپورٹ طلب کر لی ہے اور تمام فیصلے حقائق اور ثبوتوں کی بنیاد پر قانون کے مطابق کیے جائیں گے ۔ مغربی بنگال میں راجیہ سبھا کی خالی نشستوں کے لیے کاغذاتِ نامزدگی کی جانچ کا عمل مکمل ہو گیا ہے ۔ ترنمول کانگریس ( ٹی ایم سی) کے پانچ اور بھارتیہ جنتا پارٹی ( بی جے پی) کے ایک امیدوار نے پرچے داخل کیے تھے ۔ اسمبلی ذرائع کے مطابق ٹی ایم سی کی امیدوار اور اداکارہ کوئل ملک اور بی جے پی کے امیدوار راہل سنہا کے حلف ناموں میں کچھ تکنیکی خامیاں پائی گئی تھیں۔ تاہم، دن کے اختتام تک الیکشن آفیسر نے راجیو کمار، بابل سپریو اور مینکا گرو سوامی سمیت تمام امیدواروں کے کاغذات قبول کر لیے ۔

Source: UNI NEWS