مبینہ خط نے بڑھائیں ترنمول کانگریس کی مشکلات، رکن پارلیمنٹ کاکولی گھوش کا خط لکھنے سے صاف انکار

کولکتہ، 12 جون:مغربی بنگال میں داخلی انتشار اور سیاسی رسہ کشی سے جوجھ رہی ترنمول کانگریس جمعہ کے روز ایک نئے اور سنگین تنازع میں گھِر گئی ہے ۔ پارٹی کی لوک سبھا رکن پارلیمنٹ کاکولی گھوش دستیدار کا ایک مبینہ خط منظرِ عام پر آنے کے بعد قومی سلامتی اور سرحدی انتظام جیسے حساس موضوعات پر ریاست میں سیاسی بھونچال آ گیا ہے ۔ دوسری طرف، محترمہ دستیدار نے اس خط سے کسی بھی قسم کے تعلق کو یکسر مسترد کر دیا ہے ۔میڈیا اور سیاسی حلقوں میں وائرل ہونے والے اس مبینہ خط میں مغربی بنگال کی سرحدی سیکیورٹی پر گہری تشویش کا اظہار کرتے ہوئے تزویراتی لحاظ سے حساس علاقوں میں ہونے والی کچھ سرگرمیوں کی اعلیٰ سطحی جانچ کا مطالبہ کیا گیا ہے ۔ خط میں دعویٰ کیا گیا ہے کہ ایسی اطلاعات ہیں کہ مغربی بنگال کی حکمران جماعت کی حمایت سے راجیہ سبھا کے لیے نامزد ہونے والے ایک شخص کے بنگلہ دیش کی بعض انتہا پسند تنظیموں کے ساتھ مبینہ روابط ہیں۔ تاہم، خط میں یہ بھی واضح کیا گیا ہے کہ ان الزامات کی آزادانہ طور پر تصدیق نہیں ہوئی ہے ، اس لیے مجاز حکام کو اس کی جانچ کرنی چاہیے ۔ خط میں سرحدی اضلاع میں ہندوستانی فوج اور بارڈر سیکیورٹی فورس کو زمین کی الاٹمنٹ کے معاملے کی طرف بھی توجہ دلائی گئی ہے ۔ تزویراتی لحاظ سے انتہائی اہم 'سلگوڑی راہداری' (جو شمال مشرقی ریاستوں کو باقی ملک سے جوڑتی ہے ) پر خصوصی زور دیتے ہوئے کہا گیا ہے کہ ایسے حساس علاقوں میں زمین کے استعمال سے متعلق فیصلوں کا جائزہ قومی سلامتی کے نقطہ نظر سے لیا جانا چاہیے ۔

Source: UNI NEWS