میئر ان کونسل کی میٹنگ منسوخ ہونے کے بعد اب کارپوریشن کا انتہائی اہم ماہانہ اجلاس بھی ملتوی

سال 2026 کے اسمبلی انتخابات میں ترنمول کانگریس کی تاریخی شکست اور بی جے پی کی بھاری اکثریت کے ساتھ اقتدار میں واپسی کے بعد، اب کولکتہ میونسپل کارپوریشن کے اندر شدید انتظامی اور سیاسی بحران پیدا ہو گیا ہے۔ میئر ان کونسل کی میٹنگ منسوخ ہونے کے بعد اب کارپوریشن کا انتہائی اہم ماہانہ اجلاس بھی ملتوی کر دیا گیا ہے۔ جمعرات کے روز کارپوریشن کے سکریٹری کی جانب سے جاری کردہ ایک سرکاری نوٹس میں جمعہ (22 مئی) کو ہونے والے کارپوریشن کے اجلاس کو ملتوی کرنے کا اعلان کیا گیا ہے۔ تاہم، نوٹس میں اجلاس ملتوی کرنے کی کوئی خاص وجہ نہیں بتائی گئی اور نہ ہی یہ واضح کیا گیا ہے کہ اگلا اجلاس کب ہوگا۔سیاسی حلقوں کے مطابق، ریاست میں بی جے پی حکومت کے قیام کے بعد سے ہی کولکتہ کارپوریشن پر انتظامی گرفت کمزور ہونا شروع ہو گئی ہے۔گزشتہ 18 مئی، پیر کو کارپوریشن کی میئر ان کونسل کی میٹنگ ہونا طے تھی، لیکن آخری لمحے میں اسے منسوخ کر دیا گیا۔ کارپوریشن کے ذرائع کے مطابق، مونسپل کمشنر سمیتا پانڈے نے اس میٹنگ کے لیے وقت دینے سے معذرت کر لی تھی، جس کے بعد میٹنگ منسوخ کرنی پڑی۔ بعد میں میئر فرہاد حکیم نے بھی اس کی تصدیق کی۔ ذرائع کا دعویٰ ہے کہ انتخابی نتائج کے بعد سے ہی میئر فرہاد حکیم اور مونسپل کمشنر سمیتا پانڈے کے درمیان انتظامی دوری پیدا ہو گئی ہے۔ بیوروکریسی کی عدم تعاون کی وجہ سے ہی یکے بعد دیگرے اجلاس منسوخ ہو رہے ہیں۔میئر اور انتظامیہ (بیوروکریسی) کے درمیان جاری اس کھینچ تان کی وجہ سے کولکتہ کی سڑکوں کی مرمت، نکاسی آب اور دیگر عوامی خدمات و ترقیاتی کاموں کے مکمل طور پر ٹھپ ہونے کا خدشہ پیدا ہو گیا ہے۔ اگرچہ کاغذی طور پر آئندہ دسمبر تک کولکتہ میونسپل کارپوریشن کا بورڈ ترنمول کانگریس کے کنٹرول میں ہے، لیکن موجودہ حالات میں ترنمول کے کونسلرز اور رہنماوں کی پوزیشن انتہائی کمزور ہو چکی ہے۔ ابھیشیک بنرجی کے گھر پر کارپوریشن کا نوٹس بھیجے جانے اور مالا رائے کے خلاف اسلحہ ایکٹ کے تحت مقدمہ درج ہونے جیسے واقعات کے بعد، سیاسی حلقوں میں یہ افواہیں گرم ہیں کہ میئر فرہاد حکیم اپنے عہدے سے استعفیٰ دے سکتے ہیں۔ اس انتظامی اور سیاسی رسہ کشی کے درمیان یہ سوال کھڑا ہو گیا ہے کہ اپوزیشن (ترنمول) کے زیرِ انتظام یہ کارپوریشن بورڈ مزید کتنے دن برقرار رہ پائے گا۔

Source: PC-sangbadpratidin