مویشی لے جا نے کے الزام میں چار مسلم نوجوانوںکو گرفتار کر لیا گیا

مغربی بنگال کے دو شمالی اضلاع مالدہ اور کوچ بہار میں پولیس نے گزشتہ 24 گھنٹوں کے دوران الگ الگ مقامات پر کارروائی کرتے ہوئے بڑے پیمانے پر کھانسی کے سیرپ منشیات اور مویشی ضبط کیے ہیں۔ پولیس نے ان کارروائیوں کے دوران اسمگلنگ ریکیٹ کا پردہ فاش کرتے ہوئے متعدد افراد کو گرفتار بھی کیا ہے۔مالدہ ضلع کی انگلش بازار تھانہ پولیس نے منشیات کے خلاف دو الگ الگ کامیاب کارروائیاں کیں۔ منگل کی رات پولیس کی ایک ٹیم نے سادولہ پور چیک پوسٹ پر ایک پک اپ وین کو روکا۔ تلاشی کے دوران گاڑی سے 25 بوریاں برآمد ہوئیں، جن میں کھانسی کے سیرپ کی 7,500 بوتلیں چھپائی گئی تھیں۔ ضبط شدہ سیرپ کی مالیت تقریباً 16.8 لاکھ روپے بتائی گئی ہے۔ پولیس نے کالیا چوک کے رہائشی ڈرائیور محمد معبود علی کو گرفتار کر کے گاڑی ضبط کر لی ہے۔ ایک خفیہ اطلاع پر کارروائی کرتے ہوئے انگلش بازار پولیس نے منگل کے روز ہی نیشنل ہائی وے 12 پر گوڑ مالدہ اسٹیشن کے قریب مشکوک حالت میں گھومتے ہوئے ایک خاتون سمیت دو افراد کو دھر دبوچا۔ گرفتار ملزمان کی شناخت سفیدہ بی بی عرف سفیدہ خاتون اور توفیق شیخ کے طور پر ہوئی ہے۔ ان کے پاس موجود ایک لنچ باکس سے 619 گرام براون شوگر (ہیروئن کی ایک قسم) برآمد ہوئی، جس کے بعد دونوں کے خلاف NDPS ایکٹ کے تحت مقدمہ درج کر لیا گیا ہے۔ دوسری طرف، کوچ بہار ضلع کے پنڈی باڑی تھانے کی پولیس نے بدھ کے روز علی الصبح پٹلا کھاوا پنچایت کے تحت آنے والے علاقے سنگیماری پچونیر پار میں ایک ناکہ بندی کے دوران کارروائی کی۔پولیس نے شک کی بنیاد پر تین گاڑیوں کو روکا، جن کی تلاشی لینے پر ان کے اندر چھپائے گئے 10 مویشی برآمد ہوئے۔ یہ مویشی غیر قانونی طور پر پڑوسی ریاست آسام اسمگل کیے جا رہے تھے۔ گاڑیوں میں سوار افراد مویشیوں کی نقل و حمل سے متعلق کوئی بھی جائز دستاویز یا لائسنس پیش نہیں کر سکے۔ پولیس نے فوری کارروائی کرتے ہوئے آسام کے ضلع برپیٹا کے رہنے والے چاروں ملزمان امینور اسلام احمد، ابوالکلام آزاد، راشد الاسلام اور ضیاءالحق کو گرفتار کر لیا۔

Source: PC-sangbadpratidin