موقع پرستوں کا ہماری پارٹی میںکوئی جگہ نہیں ہے:سجل گھوش

مغربی بنگال میں حکومت کی تبدیلی کے بعد اچانک سرگرم ہونے والے "نئے بی جے پی" (نویہ بی جے پی) کارکنوں کے خلاف برانگر کے بی جے پی ایم ایل اے سجل گھوش کا ایک ویڈیو سوشل میڈیا پر وائرل ہو رہا ہے، جس میں انہوں نے ایسے افراد کو سخت وارننگ دی ہے۔ایک استقبالیہ تقریب سے خطاب کرتے ہوئے سجل گھوش نے واضح الفاظ میں کہا، "جو لوگ 4 مئی کو دوپہر 12 بجے کے بعد بی جے پی بنے ہیں، انہیں پارٹی میں جگہ نہیں ملے گی۔" ان کا اشارہ ان لوگوں کی طرف تھا جنہوں نے انتخابی نتائج دیکھ کر اچانک اپنی وفاداریاں بدل لیں۔ سجل گھوش کا یہ بیان ان پرانے اور وفادار کارکنوں کے حق میں دیکھا جا رہا ہے جنہوں نے مشکل وقت میں پارٹی کا ساتھ دیا۔ انہوں نے کہا، "اگر ہم مٹھی بھر کارکنوں کے ساتھ اتنا بڑا پہاڑ (انتخابات) سر کر سکتے ہیں، تو اب ہمیں کسی (نئے آنے والے) کی ضرورت نہیں ہے۔" انہوں نے طنزیہ انداز میں کہا کہ جاتے وقت آٹو اور ٹوٹو (ای رکشہ) پر ٹی ایم سی کا جھنڈا لہرا رہا تھا اور واپسی میں سب پر کمل کا نشان نظر آنے لگا۔ انہوں نے خبردار کیا کہ یہ اچانک آنے والا ہجوم عارضی طور پر تو کسی کو "بادشاہ" محسوس کرا سکتا ہے، لیکن یہی بھیڑ کسی دن پیچھے سے دھکا بھی دے سکتی ہے۔بی جے پی کے پرانے کارکن سجل گھوش کے اس بیان کو بڑے پیمانے پر شیئر کر رہے ہیں، کیونکہ ان کا ماننا ہے کہ اقتدار میں آنے کے بعد موقع پرست لوگ ان کی جگہ چھیننے کی کوشش کر رہے ہیں۔

Source: PC-sangbadpratidin