مانس بھونیا نے پارٹی سے استعفیٰ دے دیا، ترنمول کانگریس کو ایک اور بڑا جھٹکا

مدنا پور، 13 جون : مغربی بنگال کی سیاست میں ایک اہم پیش رفت کے تحت سینئر سیاست دان اور سابق ریاستی وزیر مانس بھونیا نے ہفتہ کے روز ترنمول کانگریس (ٹی ایم سی) سے استعفیٰ دے دیا، جس کے ساتھ ہی پارٹی کے ساتھ ان کا تقریباً دس سالہ تعلق ختم ہو گیا۔بھونیا نے اپنا استعفیٰ پارٹی سربراہ ممتا بنرجی کو ارسال کرتے ہوئے ترنمول کانگریس کی بنیادی رکنیت بھی چھوڑ دی۔ اپنے استعفے میں چھ بار رکنِ اسمبلی رہنے والے مانس بھونیا نے 'نظریاتی اختلافات' کا حوالہ دیتے ہوئے کہا کہ ترنمول کانگریس ان سیاسی اقدار اور اصولوں سے دور ہو گئی ہے جن کی وجہ سے وہ اس جماعت میں شامل ہوئے تھے ۔اگرچہ انہوں نے پارٹی قیادت پر براہِ راست کوئی تنقید نہیں کی لیکن ان کی علیحدگی کو پارٹی کی بدلتی ہوئی اندرونی ثقافت اور سیاسی سمت پر ایک سوالیہ نشان کے طور پر دیکھا جا رہا ہے ۔ استعفے کے بعد بھونیا نے کہا کہ وہ عوامی زندگی سے کنارہ کش نہیں ہو رہے اور سیاست میں فعال کردار ادا کرتے رہیں گے ۔تاہم انہوں نے اپنے آئندہ سیاسی لائحئہ عمل کے بارے میں کوئی وضاحت نہیں کی، جس کے بعد یہ قیاس آرائیاں زور پکڑ گئی ہیں کہ آیا وہ دوبارہ کانگریس میں شامل ہوں گے یا کسی دوسری سیاسی جماعت کا رخ کریں گے ۔ بھونیا کی یہ علیحدگی 2026 کے اسمبلی انتخابات کے بعد سامنے آئی ہے ، جن میں وہ سبانگ اسمبلی حلقے سے بی جے پی امیدوار امل کمار پانڈا کے ہاتھوں شکست کھا گئے تھے ۔ایک وقت میں متحدہ میدن پور ضلع کے بااثر ترین سیاسی رہنما¶ں میں شمار ہونے والے مانس بھونیا نے کئی دہائیوں تک سبانگ حلقے کی نمائندگی کی۔ وہ کانگریس میں طویل سیاسی سفر کے بعد 2016 میں ترنمول کانگریس میں شامل ہوئے تھے ۔ کانگریس میں رہتے ہوئے وہ ریاستی صدر اور اسمبلی میں قائدِ حزبِ اختلاف جیسے اہم عہدوں پر بھی فائز رہے تھے ۔

Source: UNI NEWS