ممتا بنرجی کی میٹنگ سے 9 کامیاب امیدوار غیر حاضر

انتخابی نتائج کے اعلان کے بعد منگل کو ممتا بنرجی نے کالی گھاٹ میں کامیاب امیدواروں کے ساتھ اہم میٹنگ کی۔ 294 نشستوں میں سے اس بار ترنمول کی نشستیں کم ہو کر صرف 80 رہ گئی ہیں۔ نومنتخب اراکینِ اسمبلی کی حلف برداری سے قبل ہی آج پارٹی لیڈر کی کال پر سب کو حاضر ہونے کی ہدایت دی گئی تھی، تاہم ذرائع کے مطابق اس میٹنگ میں کم از کم 9 کامیاب امیدوار غائب رہے، جس سے سیاسی حلقوں میں قیاس آرائیاں تیز ہو گئی ہیں۔ اس میٹنگ میں ممتا بنرجی نے پارٹی کے 'برے وقت' میں سب کو متحد ہو کر چلنے کا پیغام دیا۔ پارٹی کے کچھ لیڈروں اور کارکنوں کی جانب سے 'اندرونی سازش' کی باتوں پر ممتا نے سخت لہجے میں کہا، "جو لوگ اندرونی طور پر پارٹی کو نقصان پہنچا رہے ہیں، ان کے نام مجھے دیں۔" ایسا لگتا ہے کہ ممتا کو پارٹی کے اندرونی ٹوٹ پھوٹ کا اندازہ ہو چکا ہے، جس کا اشارہ انہوں نے منگل کی پریس کانفرنس میں بھی دیا تھا۔دوسری طرف، ان 9 امیدواروں کی غیر موجودگی پر ممتا بنرجی نے صفائی دیتے ہوئے کہا کہ "انتخابی نتائج کے بعد کولکتہ سمیت ریاست کے مختلف حصوں میں پارٹی دفاتر پر حملے ہو رہے ہیں، اور یہ امیدوار مختلف علاقوں میں صورتحال کو سنبھالنے میں مصروف ہونے کی وجہ سے میٹنگ میں نہیں آ سکے۔ اسی دوران ایک اور اہم واقعہ پیش آیا۔ میٹنگ جاری تھی کہ کولکتہ پورٹ سے کامیاب امیدوار فرہاد (بوبی) حکیم کے قافلے سے گاڑیاں ہٹا لی گئیں۔ یہ گاڑیاں 'ڈائریکٹر سیکیورٹی' کی جانب سے فراہم کی گئی تھیں۔ واضح رہے کہ اب تک فرہاد حکیم وزیر بلدیات اور میئر کی حیثیت سے 'زیڈ کیٹیگری' کی سیکیورٹی حاصل کر رہے تھے، جس میں 8 حفاظتی اہلکار اور 2 پی ایس او شامل تھے۔ چونکہ اب وہ وزیر نہیں رہیں گے، اس لیے ان کی سیکیورٹی میں کٹوتی کر دی گئی ہے۔ صرف بوبی حکیم ہی نہیں، بلکہ اروپ بسواس کے قافلے سے بھی دو گاڑیاں آج ہی ہٹا لی گئی ہیں۔

Source: PC-sangbadpratidin