مغربی بنگال کے نئے گورنر نے اپنے عہدے کا حلف اٹھالیا

کولکاتا12مارچ :مغربی بنگال کے نئے گورنر رویندر نارائن روی نے کولکتہ کے لوک بھون (سابقہ راج بھون) میں اپنے عہدے کا حلف اٹھا لیا۔ کولکتہ ہائی کورٹ کے چیف جسٹس جوئے پال نے انہیں حلف دلایا۔ اس تقریب میں وزیر اعلیٰ ممتا بنرجی، چیف سکریٹری نندنی چکرورتی، اسمبلی اسپیکر بمان بنرجی اور لیفٹ فرنٹ کے چیئرمین بمان بوس سمیت دیگر معززین موجود تھے۔مقررہ وقت کے مطابق صبح 11:30 بجے حلف برداری کی تقریب شروع ہوئی۔ حلف سے قبل اور بعد میں قومی گیت 'وندے ماترم' اور قومی ترانہ 'جنا گنا منا' بجایا گیا۔ حلف اٹھانے کے بعد نئے گورنر نے وزیر اعلیٰ اور دیگر مہمانوں سے ملاقات کی۔سی وی آنند بوس کے استعفیٰ کے بعد آر این روی کو مغربی بنگال کا مستقل گورنر مقرر کیا گیا ہے۔ اس سے قبل وہ تمل ناڈو کے گورنر تھے، جہاں ان کا ڈی ایم کے حکومت کے ساتھ مختلف بلوں کے معاملے پر اکثر تنازع رہا۔ یہاں تک کہ ایم کے اسٹالن کی حکومت نے انہیں ہٹانے کے لیے صدر جمہوریہ دروپدی مرمو سے بھی درخواست کی تھی۔ اب انہیں آنند بوس کے جانشین کے طور پر مغربی بنگال کی ذمہ داری سونپی گئی ہے۔واضح رہے کہ وزیر اعلیٰ ممتا بنرجی نے سی وی آنند بوس کے اچانک استعفیٰ پر سوال اٹھائے تھے۔ انہوں نے سوشل میڈیا پر تشویش کا اظہار کرتے ہوئے خدشہ ظاہر کیا تھا کہ شاید مرکزی وزارت داخلہ کے دباو یا سیاسی مفادات کی وجہ سے انہیں استعفیٰ دینا پڑا، خاص طور پر ریاست میں آنے والے اسمبلی انتخابات کے تناظر میں۔

Source: PC- anandabazar