مالی تنگی کی وجہ سے ماں اور بیٹے نے خودکشی کر لی

کولکاتا 27فروری :انتہائی مفلسی اور غربت کا شکار خاندان۔ دیہاتیوں کا دعویٰ ہے کہ اسی مالی تنگی کی وجہ سے پیدا ہونے والی مایوسی نے ادھیڑ عمر ماں اور نوجوان بیٹے کو خودکشی پر مجبور کر دیا۔ جمعہ کو مرشد آباد کے تھانہ کانڈی کے تحت مدھونیا گاوں میں اس واقعے سے کہرام مچ گیا۔ پولیس نے ماں اور بیٹے کی لاشیں برآمد کر کے پوسٹ مارٹم کے لیے بھیج دی ہیں۔ پولیس ذرائع کے مطابق متوفین کی شناخت دولن رائے (51 سال) اور ابھیجیت رائے (26 سال) کے طور پر ہوئی ہے، جو رشتے میں ماں اور بیٹا تھے۔ خاندان میں ان دونوں کے علاوہ اور کوئی نہیں تھا۔ مقامی لوگوں اور پولیس سے موصولہ معلومات کے مطابق، مدھونیا گاوں کی رہائشی دولن رائے دوسروں کے گھروں میں کام کاج کر کے گزر بسر کرتی تھیں۔ ان کا بیٹا ابھیجیت پیدائشی طور پر گونگا اور بہرا تھا۔ اس چھوٹے سے خاندان میں غربت ان کی مستقل ساتھی تھی۔ دیہاتیوں کے ایک حلقے کا دعویٰ ہے کہ گزشتہ چند دنوں سے دونوں شدید ذہنی تناو اور مایوسی کا شکار تھے۔ جمعہ کی دوپہر دولن نے پہلے اپنے بیٹے کو زہر دیا اور پھر خود بھی زہر پی لیا۔گھر سے کراہنے کی آوازیں سن کر کچھ پڑوسی اندر داخل ہوئے اور فوراً ماں بیٹے کو کانڈی سب ڈویڑنل ہسپتال لے گئے۔ تاہم، ڈاکٹروں نے ابھیجیت کو مردہ قرار دے دیا۔ دولن کی حالت بگڑنے پر انہیں بہرام پور کے مرشد آباد میڈیکل کالج منتقل کیا گیا، لیکن بیٹے کی موت کے کچھ ہی دیر بعد وہ بھی دم توڑ گئیں۔

Source: PC- anandabazar