ہلسا مچھلی پکڑنے کے دوران ماہی گیروں کا ٹرالر خلیج بنگال میں ڈوب گیا

ہلسا مچھلی پکڑنے کے دوران ماہی گیروں کا ٹرالر خلیج بنگال میں ڈوب گیا ہلسا مچھلی پکڑنے کے دوران ایک بار پھر خلیج بنگال میں ٹرالر ڈوب گیا۔ چند روز قبل ہی خلیج بنگال میں مشرقی مدنا پور کے شنکھر پور علاقے کا ایک ٹرالر 15 مچھیروں سمیت لاپتہ ہو گیا تھا۔ اتوار کو اس ٹرالر کا پتہ چلا اور اس کے اندر سے 9 مچھیروں کی لاشیں برآمد ہوئیں۔ باقی ماندہ افراد کی تلاش جاری ہے۔ اس واقعے نے مچھیروں میں سوگ اور خوف پیدا کر دیا ہے۔ اسی درمیان ایک اور ٹرالر ڈوبنے کا واقعہ پیش آیا۔ یہ حادثہ جنوبی 24 پرگنہ کے بک کھالی کے ساحل سے 45 کلومیٹر دور رونما ہوا۔ ویسٹ بنگال یونائیٹڈ فشرمین ویلفیئر ایسوسی ایشن کی طرف سے بتایا گیا کہ ایف بی سدھی ونائک نامی ٹرالر لے کر 12 مچھیرے سمندر میں گئے تھے۔ کاکدوِیپ کے رہائشی لکشمی نارائن داس کی اس ٹرالر نے 10 جولائی کو ساگر دوِیپ کے بینو بن سے گہرے سمندر میں الیشی مچھلی پکڑنے کے لیے سفر شروع کیا تھا۔ مچھلی پکڑ کر پیر کی رات ساحل کی طرف لوٹتے ہوئے گہرے سمندر میں یہ حادثہ پیش آیا۔ سندر بنس سمندری مچھیروں کی تنظیم کے سکریٹری ستی ناتھ پاترا نے بتایا کہ طوفانی سمندر میں ٹرالر کے نچلے حصے کے تختوں میں شگاف پڑ گیا اور پانی اندر داخل ہونے لگا۔ گہرے سمندر میں ٹرالر ڈوبنا شروع ہو گیا۔ مچھیرے جان بچانے کے لیے چیختے رہے۔ ٹرالر ڈوب گیا۔ شدید لہروں کے درمیان 12 مچھیرے کسی طرح تیرتے رہے۔ آس پاس سے کچھ ٹرالر حادثے کی جگہ پہنچے اور تمام 12 مچھیروں کو بچا لیا۔ ویسٹ بنگال یونائیٹڈ فشرمین ویلفیئر ایسوسی ایشن کے معتمد بجن مائیندی نے بتایا کہ ٹرالر کو ابھی تک بچایا نہیں جا سکا ہے۔ اب تک 6 مچھیروں کو نام کھانا گھاٹ لایا جا چکا ہے اور باقیوں کو بھی واپس لایا جا رہا ہے۔ سبھی صحت مند ہیں۔

Source: Social Media