بائیں بازو کی نشستوں کی تقسیم کے حوالے سے ہونے والی میٹنگ بے نتیجہ ختم ہو گئی

کولکاتا19فروری :بائیں بازو کے محاذ کی نشستوں کی تقسیم کے حوالے سے ہونے والی میٹنگ بے نتیجہ ختم ہو گئی۔ سی پی ایم کی جانب سے یہ امید ظاہر کی گئی تھی کہ بدھ کو ہونے والی میٹنگ میں تمام شریک جماعتوں کے ساتھ سمجھوتہ طے پا جائے گا، لیکن فارورڈ بلاک، سی پی آئی اور آر ایس پی کے ساتھ نشستوں کا تنازع برقرار ہے۔ فارورڈ بلاک 23 نشستوں سے کم پر راضی نہیں ہے، جبکہ سی پی ایم انہیں 18 سے زیادہ نشستیں دینے کو تیار نہیں ہے۔ مزید برآں، فارورڈ بلاک آئی ایس ایف کے ساتھ اتحاد کی بھی مخالفت کر رہا ہے۔ آر ایس پی نے 23 نشستوں کا مطالبہ کیا تھا لیکن اب وہ 19 پر آگئے ہیں، تاہم سی پی ایم انہیں 15 سے زیادہ نشستیں دینے پر آمادہ نہیں ہے۔ سی پی آئی نے 18 نشستوں کا مطالبہ کیا ہے۔ پارٹی کا کہنا ہے کہ اگرچہ ابھی حتمی فیصلہ نہیں ہوا، لیکن بات چیت خوشگوار ماحول میں ہوئی ہے۔کچھ ایسی نشستیں ہیں جن پر شریک جماعتوں کے ساتھ ساتھ سی پی ایم اور آئی ایس ایف بھی اپنا دعویٰ پیش کر رہے ہیں۔سماج وادی پارٹی نے بھی بائیں بازو کے محاذ سے نشستوں کا مطالبہ کیا ہے، لیکن فرنٹ کی دیگر شریک جماعتیں اس کی مخالفت کر رہی ہیں۔بدھ کو ہونے والی اس میٹنگ میں بائیمن بوس، محمد سلیم، نرین چٹوپادھیائے اور تپن ہوڑ جیسے سینئر رہنما موجود تھے۔ اب فارورڈ بلاک کی ریاستی کمیٹی کا اجلاس 20 تاریخ کو ہوگا جس میں وہ اپنا حتمی فیصلہ سنائیں گے۔ اس کے بعد سی پی ایم دوبارہ شریک جماعتوں کے ساتھ دو طرفہ ملاقاتیں کرے گی تاکہ تعطل کو ختم کیا جا سکے۔

Source: PC- sangbadpratidin