کیا زلزلہ سے کولکاتا پھر لرزے گا

کولکتہ27فروری : مغربی بنگال میں زلزلہ اب خوف کی علامت بن چکا ہے۔ ایک کے بعد ایک اضلاع زلزلے کی زد میں ہیں۔ آج، جمعہ کو کولکتہ سمیت پورا بنگال ایک زوردار زلزلے سے لرز اٹھا۔ ریکٹر اسکیل پر اس زلزلے کی شدت 5.5 ریکارڈ کی گئی۔ اس زلزلے کا مرکز بنگلہ دیش کا علاقہ ستکھیرا تھا۔ اس شدید زلزلے نے سب کو خوفزدہ کر دیا ہے، لیکن اس سے بھی بڑا سوال یہ اٹھ رہا ہے کہ کیا یہ بار بار آنے والے زلزلے کسی بڑی تباہی کا اشارہ ہیں؟ کیا کولکتہ میں دوبارہ زلزلہ آئے گا؟ گزشتہ روز، جمعرات کی دوپہر دارجلنگ اور جلپائی گوڑی میں زلزلہ محسوس کیا گیا تھا۔ شمالی بنگال میں ایک گھنٹے کے اندر دو بار جھٹکے محسوس کیے گئے۔ اس کے بعد آج صبح پھر بنگال لرز اٹھا۔ دارجلنگ میں 2.5 شدت کا زلزلہ محسوس کیا گیا، جبکہ سکم کے علاقے منگن میں یکے بعد دیگرے کئی جھٹکے لگے۔ ریکٹر اسکیل پر ان کی شدت 3.9 اور 3.7 تھی۔ صبح چار بجے کے قریب آنے والے ان جھٹکوں کا اثر شمالی بنگال میں بھی محسوس کیا گیا۔ سکم میں ایک ہی دن میں 16 بار زلزلے کے جھٹکے ریکارڈ کیے گئے۔ آج کے زلزلے کا مرکز بنگلہ دیش کا ضلع ستکھیرا تھا، جو مغربی بنگال کے علاقے ٹاکی (Taki) سے محض 26 کلومیٹر کے فاصلے پر واقع ہے۔ چونکہ مرکز بنگال کے بالکل قریب تھا، اس لیے بنگلہ دیش سے متصل اضلاع کے ساتھ ساتھ کولکتہ میں بھی شدید جھٹکے محسوس کیے گئے۔ ڈنکونی، چونچڑہ سے لے کر ڈائمنڈ ہاربر اور گوسابا تک ہر جگہ زلزلے کی شدت کافی زیادہ تھی۔ ماہرین کا کہنا ہے کہ زلزلے کا مرکز سطح زمین سے زیادہ گہرائی میں نہ ہونے کی وجہ سے اس کے جھٹکے اتنے زوردار تھے۔

Source: PC- tv9bangla