کیا آپ بنگال کے وزیر اعلیٰ بننا چاہتے ہیں : ممتا بنرجی نے نریندر مودی سے پوچھا

بنگال کے انتخابی میدان میں وزیر اعظم نریندر مودی اور وزیر اعلیٰ ممتا بنرجی کے درمیان لفظی جنگ اب ایک دلچسپ موڑ اختیار کر گئی ہے۔ مودی کے اس بیان پر کہ "بنگال کی تمام 294 نشستوں پر میں ہی امیدوار ہوں"، ممتا بنرجی نے سخت اور طنزیہ ردعمل دیا ہے۔ اتوار کو سلی گوڑی میں ایک انتخابی جلسے کے دوران وزیر اعظم مودی نے ممتا بنرجی کے پرانے انداز کو اپناتے ہوئے کہا کہ بنگال کی تمام 294 نشستوں پر وہ خود امیدوار ہیں، اس لیے عوام مودی کو دیکھ کر ووٹ دیں اور بی جے پی کو ایک موقع فراہم کریں۔اس پر ممتا بنرجی نے پوچھا، "اگر آپ تمام 294 سیٹوں پر امیدوار ہیں، تو پھر وزارتِ عظمیٰ چھوڑ دیں۔ بتائیے، کیا آپ بنگال کے وزیر اعلیٰ بننا چاہتے ہیں؟ آپ کون سا عہدہ رکھیں گے، وزیر اعظم یا وزیر اعلیٰ؟" انہوں نے مودی کو ایک بار پھر 'بیرونی' قرار دیتے ہوئے کہا کہ پہلے دہلی سنبھالیں، پھر بنگال کی طرف دیکھیں۔ ممتا نے گرج دار آواز میں کہا کہ اگر کوئی بنگال کی طرف بری نظر سے دیکھے گا، تو بنگال کے عوام اسے برداشت نہیں کریں گے۔

Source: PC-sangbadpratidin