کولکتہ سے مغربی ایشیا کے لیے پروازیں متاثر، آنے جانے والی سات پروازیں منسوخ

کولکاتا6مارچ :مغربی ایشیا جانے والی اور وہاں کے مختلف ممالک سے کولکتہ آنے والی مجموعی طور پر سات بین الاقوامی پروازیں جمعہ کو منسوخ کر دی گئیں۔ ہوائی اڈے کے ذرائع کے مطابق، کولکتہ ایئرپورٹ سے دبئی، دوحہ اور ابوظہبی جانے والی چار پروازیں منسوخ ہوئیں، جبکہ دوسری طرف ابوظہبی، دبئی اور دوحہ سے کولکتہ آنے والی تین پروازیں بھی منسوخ کر دی گئیں۔ منسوخ شدہ پروازوں میں ایئر عربیہ کی ایک پرواز (کولکتہ سے ابوظہبی)، اتحاد ایئر ویز کی دو (ایک آنے والی اور ایک جانے والی)، قطر ایئر ویز کی دو (دوحہ-کولکتہ روٹ) اور ایمریٹس کی دو پروازیں (دبئی-کولکتہ روٹ) شامل ہیں۔گزشتہ 28 فروری سے اسرائیل اور امریکہ کی ایران کے خلاف فوجی مہم کے بعد سے مغربی ایشیا میں فوجی تناو عروج پر ہے۔ سلامتی کے پیش نظر مغربی ایشیا کے ممالک نے یکے بعد دیگرے اپنی فضائی حدود عارضی طور پر بند کر دی تھیں۔کولکتہ سے دبئی کے لیے آخری پرواز 28 فروری کو صبح 9 بج کر 35 منٹ پر روانہ ہوئی تھی۔ اس کے بعد 113 گھنٹے 5 منٹ تک سروس مکمل طور پر بند رہنے کے بعد بدھ کو دوبارہ بحال ہوئی تھی۔ جمعرات سے دبئی کے لیے پروازیں شروع ہوئی تھیں اور جمعہ سے دوحہ و ابوظہبی کے لیے بھی جزوی خدمات بحال ہوئی ہیں، تاہم اب بھی کئی پروازیں منسوخ ہو رہی ہیں۔کولکتہ ایئرپورٹ کے ایک افسر نے بتایا کہ مغربی ایشیا کی صورتحال پر کڑی نظر رکھی جا رہی ہے اور مسافروں کے تحفظ کے پیش نظر پروازوں کے راستوں کا جائزہ لیا جا رہا ہے۔ مسافروں کو مشورہ دیا گیا ہے کہ وہ اپنی پرواز کے شیڈول اور کسی بھی قسم کی تبدیلی کے بارے میں مسلسل معلومات حاصل کرتے رہیں۔

Source: PC- anandabazar