میٹرو کی بلیو لائن پر خودکشی کی کوشش

ہفتے کے آغاز میں کولکتہ میٹرو کی 'بلیو لائن پر خودکشی کی کوشش کے باعث مسافروں کو شدید مشکلات کا سامنا کرنا پڑا۔ یہ واقعہ پیر کی صبح مصروف ترین اوقات میں پیش آیا، جس کی وجہ سے میٹرو خدمات جزوی طور پر معطل رہیں۔یہ واقعہ صبح تقریباً 11:30 بجے مہاتما گاندھی روڈ میٹرو اسٹیشن پر پیش آیا۔جب ٹالی گنج کی طرف جانے والی ٹرین پلیٹ فارم پر داخل ہو رہی تھی، ایک شخص نے اچانک ٹرین کے سامنے چھلانگ لگا دی۔ ڈرائیور نے فوری ایمرجنسی بریک لگا کر ٹرین کو روکنے کی کوشش کی۔ واقعے کے فوراً بعد اپ اور ڈاون لائنوں پر ٹرینوں کی آمد و رفت روک دی گئی۔ پیر کا دن ہونے کی وجہ سے اسٹیشنوں پر دفاتر جانے والے مسافروں کا بھاری رش تھا، جنہیں شدید دشواری کا سامنا کرنا پڑا۔کچھ دیر بعد میٹرو حکام نے سروس کو دو حصوں میں بحال کیا۔ ٹرینیں دکشنیشور سے دم دم اور کوی سبھاش سے ایسپلانیڈ کے درمیان چلائی گئیں، جبکہ وسطی حصہ عارضی طور پر بند رہا۔ لائن کی بجلی بند کرنے کے بعد اس شخص کو پٹریوں سے نکال کر فوری طور پر اسپتال منتقل کیا گیا۔دوپہر 12 بجے کے بعد میٹرو کی تمام خدمات دوبارہ معمول پر آ گئیں۔واضح رہے کہ چند دن قبل بھی بلیو لائن پر اسی طرح کا واقعہ پیش آیا تھا، جس نے میٹرو اسٹیشنوں پر سکیورٹی اور مسافروں کی حفاظت کے حوالے سے دوبارہ سوالات کھڑے کر دیے ہیں۔

Source: PC-sangbadpratidin