خاتون کو اسلحہ دکھا کر لوٹنے کے الزام میں دو ایپ کیپ گرفتار

کولکتہ میں ایک خاتون کو اسلحہ دکھا کر لوٹنے کے معاملے میں پولیس نے دو ایپ کیب ڈرائیوروں کو گرفتار کر لیا ہے۔ لال بازار کے محکمہ سراغ رساں (ڈی ٹیکٹو ڈیپارٹمنٹ) اور شیکسپیئر سرانی تھانے کی مشترکہ کارروائی میں یہ گرفتاریاں عمل میں آئی ہیں۔کولکتہ پولیس کی چیف آف انٹیلی جنس سوما داس مترا کے مطابق، گرفتار ملزمان کی شناخت پپو یادو اور بہاری یادو کے طور پر ہوئی ہے، جو ٹینگرا کے رہائشی ہیں۔یہ واقعہ 16 اپریل کی رات کو پیش آیا۔ کالج اسٹریٹ کی رہائشی ایک نوجوان خاتون شیکسپیئر سرانی کے ایک بار سے واپس گھر جا رہی تھیں۔خاتون نے 'یاتری ساتھی' ایپ کے ذریعے کیب بک کی، جس کا ڈرائیور بہاری یادو تھا۔ کچھ دور جانے کے بعد ڈرائیور بہاری یادو نے خاتون سے کہا کہ وہ مزید نہیں جا سکتا اور اس کا بھائی پپو یادو اپنی کیب میں اسے گھر چھوڑ دے گا۔ خاتون پپو یادو کی گاڑی میں سوار ہو گئیں۔پپو یادو خاتون کو ایک سنسان راستے پر لے گیا جہاں بہاری یادو بھی پہنچ گیا۔ وہاں ملزمان نے خاتون کی گردن پر پستول رکھ کر اسے ڈرایا اور اس سے نقدی، موبائل فون اور سونے کا ہار چھین لیا۔ لوٹ مار کے بعد ملزمان نے خاتون کو دوبارہ گاڑی میں بٹھایا اور کالج اسٹریٹ میں ان کے گھر کے قریب اتار کر فرار ہو گئے۔

Source: PC-sangbadpratidin