کولکاتا میں کئی جگہوں پر ای ڈی کے چھاپے

کولکتہ میں انتخابات سے عین قبل انفورسمنٹ ڈائریکٹوریٹ (ای ڈی) ایک بار پھر متحرک ہو گئی ہے۔ بدھ کی صبح سے مرکزی تفتیشی کارندوں نے شہر کی ایک معروف ریئل اسٹیٹ کمپنی کے کئی دفاتر پر چھاپے مارے ہیں۔ بدھ کی صبح ای ڈی کی کئی ٹیمیں مرکزی فورسز کے ساتھ سی جی او کمپلیکس سے روانہ ہوئیں۔ انہوں نے شہر اور مضافات میں 6 سے 7 مقامات پر چھاپے مارے، جن میں کیشٹو پور کا ایک فلیٹ اور پرنس انور شاہ روڈ کے پتے شامل ہیں۔متعلقہ تعمیراتی کمپنی کے دفاتر، رہائشی فلیٹس اور کمپنی کے عہدیداروں کے گھروں کی تلاشی لی جا رہی ہے۔ای ڈی ذرائع کے مطابق یہ کارروائی مالی خرد برد اور غیر قانونی لین دین کی تحقیقات کے سلسلے میں کی گئی ہے۔ خاص طور پر زمین سے متعلق بڑے مالی لین دین کی معلومات تلاش کی جا رہی ہیں۔گزشتہ چند ہفتوں کے دوران ای ڈی نے ریاست میں کئی معاملات میں سرگرمی دکھائی ہے۔ راس بہاری سے ترنمول امیدوار دیباشیش کمار سے دو بار پوچھ گچھ کی گئی ہے۔ اس کے علاوہ بھرتی اسکام کیس میں وزیر فائر بریگیڈ سوجیت بوس اور وزیر خوراک رتھین گھوش کو بھی طلب کیا گیا ہے۔بالی گنج میں سونا پاپو کے گھر کی تلاشی کے دوران اسلحہ برآمد ہوا تھا۔چند ہفتے قبل جب ای ڈی نے آئی پیک کے دفتر اور پرتیک جین کے گھر پر چھاپہ مارا تھا، تو خود وزیر اعلیٰ ممتا بنرجی وہاں پہنچ گئی تھیں۔ یہ معاملہ فی الحال سپریم کورٹ میں زیر سماعت ہے۔

Source: PC-anandabazar