کولکتہ میں سی ای او (CEO) دفتر کے سامنے بی ایل اوز (BLOs) کا احتجاج

کولکاتا22دسمبر: کولکتہ میں مرکزی الیکشن کمیشن کے دفتر یعنی سی ای او دفتر کے سامنے ایک بار پھر بی ایل اوز نے زبردست احتجاج کیا۔ مظاہرین نے بیریکیڈز توڑ کر دفتر کے اندر داخل ہونے کی کوشش کی، جس سے صورتحال کشیدہ ہوگئی۔ پولیس نے انہیں روکنے کی کوشش کی تو دونوں فریقین کے درمیان ہاتھا پائی شروع ہوگئی۔ اس دوران پولیس نے ایک شخص کو حراست میں بھی لیا ہے۔ مظاہرین کا دعویٰ ہے کہ ووٹر لسٹ کا مسودہ (Draft Voter List) شائع ہونے کے بعد سے کمیشن بار بار ایپ میں تبدیلیاں کر رہا ہے۔ اس سے ایک طرف ذہنی دباو بڑھ رہا ہے تو دوسری طرف شدید الجھن پیدا ہو رہی ہے۔ کمیشن کے اسی اقدام کے خلاف ’بی ایل او ادھیکار رکشا کمیٹی‘ احتجاج کر رہی ہے۔ مزید برآں، مظاہرین کا کہنا ہے کہ انہوں نے چیف الیکشن کمشنر سے ملاقات کا وقت مانگا تھا، لیکن انہیں وقت نہیں دیا گیا۔ واضح رہے کہ چند روز قبل الیکشن کمیشن نے ووٹر لسٹ کا مسودہ جاری کیا تھا، جس میں کئی غلطیاں سامنے آئی ہیں۔ ان غلطیوں کی وجہ سے عوام میں خوف و ہراس پایا جاتا ہے۔ اسی دوران گزشتہ چند دنوں میں بی ایل اوز کی ایپ میں کئی تبدیلیاں کی گئی ہیں اور نئی ہدایات جاری کی گئی ہیں۔ اسی کے احتجاج میں پیر کے روز ’بی ایل او ادھیکار رکشا کمیٹی‘ کے ارکان چیف الیکشن آفیسر سے ملنا چاہتے تھے، لیکن ملاقات نہ ہونے کے بعد احتجاج پرتشدد رخ اختیار کر گیا۔ پولیس کے بیریکیڈز توڑ کر دفتر میں داخل ہونے کی کوشش کے بعد کولکتہ میں الیکشن کمیشن کے دفتر کی سیکیورٹی پر ایک بار پھر سوالات اٹھ کھڑے ہوئے ہیں۔ ریاست میں ایس آئی آر (SIR) کے اعلان کے بعد سے ہی مختلف مسائل کو لے کر یہ کمیٹی سی ای او دفتر کے سامنے دھرنا دے رہی ہے۔

Source: PC- sangbadpratidin