کولکتہ میں بارش کے ساتھ 40-50 کلومیٹر فی گھنٹہ کی رفتار سے طوفان کا امکان

کولکاتا16مارچ :بنگالی مہینہ کے آغاز کے ساتھ ہی طوفان کا زور شروع ہو گیا ہے۔ جنوبی بنگال کے کئی اضلاع میں اتوار کی شام طوفان آیا۔ کولکتہ میں بھی دن کا بیشتر حصہ تیز ہوائیں چلتی رہیں۔ ریاست کے ضلع بانکوڑا میں طوفان کی وجہ سے ٹین کی چھت گرنے سے ایک شخص ہلاک اور چار دیگر زخمی ہو گئے۔ کئی مقامات پر درخت گرنے سے جنوب مشرقی ریلوے سیکشن پر ٹرینوں کی آمد و رفت بھی عارضی طور پر متاثر ہوئی۔ محکمہ موسمیات کا خیال ہے کہ یہ صورتحال مزید چند دن جاری رہ سکتی ہے۔ محکمہ موسمیات کے مطابق کولکتہ سمیت جنوبی بنگال میں آئندہ اتوار تک وقفے وقفے سے آندھی اور بارش کا سلسلہ جاری رہ سکتا ہے۔ پیر اور منگل کے لیے خاص طور پر الرٹ جاری کیا گیا ہے۔ کولکتہ میں پیر کو گرج چمک کے ساتھ بارش کے علاوہ 40 سے 50 کلومیٹر فی گھنٹہ کی رفتار سے تیز ہوائیں چلیں گی۔ منگل کو ہوا کی رفتار میں کچھ کمی آ سکتی ہے۔ اس کے بعد ہفتہ اور اتوار کو شہر میں دوبارہ موسم کی وارننگ جاری کی گئی ہے۔ جنوبی بنگال کے باقی اضلاع کے لیے بھی یہی پیش گوئی ہے۔ تاہم، محکمہ موسمیات نے ہگلی، مشرقی بردھوان، مغربی بردھوان اور بیربھوم کے لیے نارنجی الرٹ جاری کیا ہے۔ ان اضلاع میں پیر کو بارش کے ساتھ 50 سے 60 کلومیٹر فی گھنٹہ کی رفتار سے آندھی چلے گی، جس کی رفتار 70 کلومیٹر تک بھی پہنچ سکتی ہے۔ آندھی اور بارش کی وجہ سے جنوبی بنگال میں اگلے دو دنوں میں زیادہ سے زیادہ درجہ حرارت میں دو سے چار ڈگری کی کمی واقع ہوگی۔

Source: PC- anandabazar