کشور کمار بسواس کو کولکتہ کارپوریشن کا نیا سکریٹری مقرر کیا گیا

میئر ان کونسل کی میٹنگ کی منسوخی اور کارپوریشن کے ماہانہ اجلاس کو ملتوی کیے جانے کے بعد، اب ریاستی حکومت نے ایک اور بڑا قدم اٹھاتے ہوئے کولکتہ میونسپل کارپوریشن کے سکریٹری کے عہدے پر بڑا ردو بدل کر دیا ہے۔ ریاست میں سیاسی تبدیلی کے بعد سے ہی نئی حکومت کولکتہ کارپوریشن کو لے کر یکے بعد دیگرے سخت فیصلے لے رہی ہے۔ اب تک سوپن کمار کنڈو کولکتہ میونسپل کارپوریشن کے سکریٹری کے طور پر کام کر رہے تھے۔ انہیں اب تبدیل کر کے او ایس ڈی، اسٹیٹ گزیٹیئرز کے عہدے پر بھیج دیا گیا ہے۔ ان کی جگہ کشور کمار بسواس کو کولکتہ کارپوریشن کا نیا سکریٹری مقرر کیا گیا ہے۔ وہ اس سے قبل مشرقی بردوان ضلع پریشد کے ڈپٹی سکریٹری کے عہدے پر تعینات تھے۔ واضح رہے کہ یہ دونوں افسران ڈبلیو بی سی ایس رینک کے ہیں۔ سال 2026 کے اسمبلی انتخابات میں ترنمول کی کراری ہار اور بی جے پی کی بھاری اکثریت کے ساتھ اقتدار میں آمد کے بعد سے ہی کولکتہ کارپوریشن کے اندر شدید انتظامی بحران دیکھا جا رہا ہے: گزشتہ 18 مئی (پیر) کو آخری لمحے میں کارپوریشن کی میئر ان کونسل کی میٹنگ منسوخ کر دی گئی تھی۔ اس کے بعد گزشتہ جمعرات کو کارپوریشن کے سکریٹری کی جانب سے نوٹس جاری کر کے جمعہ کو ہونے والا ماہانہ اجلاس بھی ملتوی کر دیا گیا۔ اجلاس کیوں ملتوی کیا گیا، نوٹس میں اس کی کوئی واضع وجہ نہیں بتائی گئی اور نہ ہی یہ بتایا گیا ہے کہ اگلی میٹنگ کب ہوگی۔ اس غیر یقینی صورتحال کے درمیان اب خود کارپوریشن کے سکریٹری کو ہٹا کر نئے افسر کا تعینات کیا جانا انتہائی اہم مانا جا رہا ہے۔ سیاسی حلقوں کے مطابق، کارپوریشن کے انتظامی امور کو اپنے کنٹرول میں لینے کے لیے ہی ریاستی حکومت نے یہ لگاتار فیصلے کیے ہیں۔ اگرچہ کاغذی طور پر کولکتہ کارپوریشن کا بورڈ ابھی بھی ترنمول کے پاس ہے، لیکن یکے بعد دیگرے میٹنگز کا منسوخ ہونا اور اعلیٰ بیوروکریسی کی سطح پر یہ ردو بدل ثابت کرتا ہے کہ کارپوریشن پر سبکدوش ہونے والی حکمران جماعت کا کنٹرول اب ختم ہو چکا ہے۔ نئی حکومت کے ان سخت اقدامات کے بعد اب کولکتہ کارپوریشن کی انتظامیہ کیا رخ اختیار کرتی ہے، یہ دیکھنے والی بات ہوگی۔

Source: PC-anandabazar