ایران اور اسرائیل کے درمیان جاری کشیدگی کے اثرات اب براہِ راست کولکتہ کے کچن تک پہنچ گئے ہیں

کولکاتا6مارچ :ایران اور اسرائیل کے درمیان جاری کشیدگی کے اثرات اب براہِ راست کولکتہ کے کچن تک پہنچ گئے ہیں۔ حال ہی میں یہ فیصلہ لیا گیا ہے کہ ایل پی جی کے نئے 'ڈبل سلنڈر' کنکشن فی الحال فراہم نہیں کیے جائیں گے۔ ایل پی جی ڈسٹری بیوٹرز کو ہدایت دی گئی ہے کہ اگر کوئی صارف دوسرے سلنڈر کے لیے درخواست دیتا ہے، تو فی الحال اسے کنکشن دینے سے گریز کیا جائے۔ذرائع کے مطابق تیل کمپنیوں کی جانب سے یہ احکامات حال ہی میں جاری کیے گئے ہیں۔ بتایا گیا ہے کہ مشرقِ وسطیٰ میں جنگی صورتحال کے باوجود گیس کی فراہمی میں کوئی خلل نہ پڑے، اس لیے احتیاطاً یہ قدم اٹھایا گیا ہے۔ اس کا مطلب یہ ہے کہ جن گھروں میں اس وقت صرف ایک سلنڈر ہے، انہیں فی الحال اسی پر اکتفا کرنا ہوگا۔ گیس ڈیلرز کا کہنا ہے کہ صورتحال معمول پر آنے میں ابھی کچھ وقت لگ سکتا ہے۔ماہرین کا کہنا ہے کہ آبنائے ہرمز جیسے اہم بحری راستے سے تیل اور گیس کے جہازوں کی آمد و رفت متاثر ہونے کی صورت میں ایل پی جی کی سپلائی پر بڑا دباو پڑ سکتا ہے۔ بھارت اپنی ایندھن کی درآمدات کا ایک بڑا حصہ اسی راستے سے حاصل کرتا ہے۔ مانا جا رہا ہے کہ بھارت میں گھریلو استعمال کی ایل پی جی کی فراہمی کا نظام اس وقت سب سے زیادہ خطرے میں ہے، کیونکہ خام تیل یا ایل این جی کے مقابلے میں ایل پی جی کے ذرائع محدود ہیں اور اس کا ذخیرہ بھی نسبتاً کم ہے۔بھارت اپنی ایل پی جی کی کل طلب کا تقریباً 80 سے 85 فیصد حصہ درآمد کرتا ہے۔ اس کا زیادہ تر حصہ خلیجی ممالک سے آتا ہے اور تقریباً تمام جہاز آبنائے ہرمز سے گزر کر بھارت پہنچتے ہیں۔ سرکاری ذرائع کے مطابق، اس وقت ملک میں تقریباً 30 دنوں کا ایل پی جی ذخیرہ موجود ہے۔

Source: PC- sangbadpratidin