اقبال پور میدان جنگ بن گیا، ٹی ایم سی اور بی جے پی کے حامیوں کے درمیان مار پیٹ

کولکتہ کے اقبال پور علاقے میں پیر کی رات انتخابی مہم کے دوران ترنمول کانگریس اور بی جے پی کارکنوں کے درمیان شدید تصادم ہوا۔ اس واقعے کے بعد علاقے میں کشیدگی پھیل گئی اور پولیس کو سخت کارروائی کرنی پڑی۔اس تصادم کے سلسلے میں پولیس نے کل تین ایف آئی آر درج کی ہیں اور اب تک 9 افراد کو گرفتار کیا گیا ہے۔ بتایا جا رہا ہے کہ گرفتار شدگان میں 5 بی جے پی اور 4 ترنمول کے حامی ہیں۔اقبال پور کے حسین شاہ روڈ پر بی جے پی امیدوار راکیش سنگھ کی حمایت میں ایک انتخابی جلسہ جاری تھا۔ الزام ہے کہ اس دوران مقامی ترنمول کارکنوں نے بی جے پی کے خلاف نعرے بازی شروع کی، جس کے بعد دونوں گروپوں میں تلخ کلامی اور پھر ہاتھا پائی شروع ہوگئی۔: صورتحال پر قابو پانے کی کوشش میں 6 پولیس اہلکار زخمی ہوئے۔ الزام ہے کہ بی جے پی کارکنوں نے پولیس کے ساتھ بدتمیزی کی اور ان کے ہیلمٹ چھیننے کی کوشش کی۔ کشیدگی پر قابو پانے کے لیے پولیس کو لاٹھی چارج بھی کرنا پڑا۔بی جے پی امیدوار راکیش سنگھ جب موقع پر پہنچے تو انہیں 'گو بیک' کے نعروں کا سامنا کرنا پڑا۔ اس کے احتجاج میں وہ اپنے حامیوں کے ساتھ اقبال پور تھانے کے سامنے دھرنے پر بیٹھ گئے۔ اسی دوران ترنمول کے حامی بھی وہاں پہنچ گئے اور دونوں جانب سے نعرے بازی کی وجہ سے علاقہ میدانِ جنگ بن گیا۔فی الحال علاقے میں پولیس کی بھاری نفری تعینات ہے اور پولیس گرفتار افراد سے پوچھ گچھ کر کے دیگر ملزمان کی تلاش کر رہی ہے۔

Source: PC-anandabazar