عبوری بجٹ میں 100 دن کے کام کے لیے ریاست کی جانب سے فنڈز میں اضافے کی تجویز

کولکاتا5فروری :مرکزی حکومت کی جانب سے 100 دن کے کام کے منصوبے سے مہاتما گاندھی کا نام ہٹانے کے احتجاج میں، ریاستی حکومت نے اسی طرز پر اپنے منصوبے کے ساتھ 'باپو' کا نام جوڑ دیا تھا۔ ریاست کے 'کرم شری' پروجیکٹ کا نام بدل کر 'مہاتما شری' رکھا گیا تھا۔ اب ریاست کے عبوری بجٹ میں اس منصوبے کے لیے فنڈز بڑھانے کی تجویز پیش کی گئی ہے۔ وزیر خزانہ چندریما بھٹاچاریہ نے 100 دن کے کام کے لیے 2000 کروڑ روپے مختص کرنے کی تجویز دی ہے، جس سے بلاشبہ بڑی تعداد میں مزدور اور کسان مستفید ہوں گے۔مہاتما شری' منصوبے کے لیے 2000 کروڑ روپے مختص کیے گئے ہیں تاکہ دیہی علاقوں میں زیادہ سے زیادہ لوگوں کو کام مل سکے۔ گزشتہ اتوار کو پیش کیے گئے مرکزی بجٹ میں وزیر خزانہ نرملا سیتارمن نے دیہی روزگار کے حوالے سے کوئی بڑا اعلان نہیں کیا تھا، جس کے جواب میں ممتا حکومت کا یہ قدم مرکز کے لیے ایک چیلنج سمجھا جا رہا ہے۔پارلیمنٹ کے سرمائی اجلاس میں مرکز نے اسکیم کے نام سے 'مہاتما گاندھی' ہٹا کر 'رام' کا نام شامل کیا تھا، جس پر اپوزیشن نے شدید اعتراض کیا تھا۔ اس کے جواب میں ریاست نے اپنے پروجیکٹ کا نام 'مہاتما شری' کر دیا ہے۔ وزیر اعلیٰ ممتا بنرجی نے پہلے ہی اعلان کر دیا تھا کہ مرکز پر انحصار کرنے کے بجائے ریاست اپنے خزانے سے مزدوروں کو کام کے پیسے دے گی، کیونکہ مرکز طویل عرصے سے واجبات ادا نہیں کر رہا۔دیہی بنگال میں اس اعلان سے خوشی کی لہر دوڑ گئی ہے، کیونکہ 2026 کے انتخابات سے قبل دور دراز علاقوں کے غریب عوام کے لیے روزگار کی یہ یقین دہانی سیاسی طور پر بھی انتہائی اہم ثابت ہو سکتی ہے۔

Source: PC- sangbadpratidin