آئی پیک سے متعلق کیس ہائی کورٹ میں ملتوی ہوتے ہی ای ڈی نے چیف جسٹس سے رجوع کر لیا, فوری سماعت کی درخواست مسترد

جسٹس شبھرا گھوش نے آئی پیک سے متعلق کیس کی سماعت 14 جولائی تک ملتوی کر دی ہے۔ اس کے فوراً بعد انفورسمنٹ ڈائریکٹوریٹ (ای ڈی) نے کلکتہ ہائی کورٹ کے چیف جسٹس کے دفتر سے رجوع کیا اور استدعا کی کہ اس کیس کی فوری سماعت کی جائے! تاہم، ہائی کورٹ کے کارگزار چیف جسٹس سوجوئے پال نے یہ درخواست منظور نہیں کی۔ ای ڈی نے آئی پیک کے دفتر میں تحقیقات کے دوران رکاوٹ ڈالنے کے خلاف کلکتہ ہائی کورٹ میں عرضی دائر کی تھی۔ جمعہ کی دوپہر جسٹس گھوش کی عدالت میں اس کیس کی سماعت ہونی تھی، لیکن جسٹس صاحبہ نے کمرہ عدالت میں آنے کے باوجود سماعت شروع نہیں کی۔ عدالت میں شدید بھیڑ کی وجہ سے وہ کیس سنے بغیر ہی وہاں سے چلی گئیں۔ کیس ملتوی ہونے پر ای ڈی نے سخت ناخوشگواری کا اظہار کیا۔ ای ڈی نے کارگزار چیف جسٹس سوجوئے پال سے فوری سماعت کی درخواست کی۔ پہلے یہ معاملہ زبانی طور پر چیف جسٹس کے دفتر کو بتایا گیا۔ ہائی کورٹ کے ذرائع کے مطابق، ای ڈی کی استدعا تھی کہ اگر جسٹس گھوش کی عدالت میں سماعت ممکن نہیں تو کیس کسی دوسرے جج کو منتقل کر دیا جائے۔ چیف جسٹس کے دفتر سے ای ڈی کو ہدایت دی گئی کہ وہ اپنی درخواست تحریری طور پر جمع کرائیں، جس کے بعد اس پر فیصلہ لیا جائے گا۔ ای ڈی نے ہنگامی بنیادوں پر بنچ تشکیل دے کر سماعت کی تحریری درخواست دی، لیکن چیف جسٹس نے اسے قبول نہیں کیا۔ وکلاءکے مطابق، چونکہ عدالتی حکم (Judicial Order) جاری ہو چکا ہے، اس لیے چیف جسٹس نے سماعت کے معاملے میں مداخلت کرنے سے انکار کر دیا۔ اب اس کیس کی سماعت 14 تاریخ کو ہی ہوگی۔

Source: PC- anandabazar