ہمایون کبیر، وزیر اعلیٰ شوبھندو ادھیکاری کےلئے مشہور مٹھائی منوہرا لے کر اسمبلی پہنچے

مرشد آباد سے نو منتخب رکنِ اسمبلی ہمایوں کبیر آج مغربی بنگال اسمبلی میں حلف برداری کی تقریب میں ایک منفرد انداز میں نظر آئے۔ وہ وزیر اعلیٰ شبھیندو ادھیکاری کے لیے خاص طور پر مرشد آباد کی مشہور مٹھائی 'منوہرا' تحفے میں لے کر آئے۔عام جنتا اونیان پارٹی' کے چیئرمین ہمایوں کبیر نے وزیر اعلیٰ شبھیندو ادھیکاری کو 'اچھا آدمی' قرار دیتے ہوئے ان کے لیے مٹھائی کا تحفہ پیش کیا۔ انہوں نے کہا، "سیاسی تلخیاں بہت ہو چکی ہیں، اب منہ میٹھا کرنے کا وقت ہے۔ منوہرا دل کو سکون پہنچاتی ہے، اسی لیے میں یہ لے کر آیا ہوں۔" انہوں نے بتایا کہ دکان میں مٹھائی ختم ہونے کی وجہ سے وہ وزیر اعلیٰ کے لیے کچھ کم مقدار میں مٹھائی لا پائے ہیں۔ہمایوں کبیر نے اس انتخاب میں مرشد آباد کی دو نشستوں، نودہ اور ریجی نگر سے کامیابی حاصل کی ہے۔ آئین کے مطابق وہ ایک ہی نشست رکھ سکتے ہیں، اس لیے انہوں نے نودہ کے رکنِ اسمبلی کے طور پر حلف اٹھایا اور ریجی نگر کی نشست چھوڑ دی ہے۔ انہوں نے اعلان کیا کہ ریجی نگر کے ضمنی انتخاب میں ان کے بیٹے غلام نبی آزاد (عرف رابن) انتخاب لڑیں گے۔ ہمایوں کبیر نے بتایا کہ ان کے بیٹے کا نام جموں و کشمیر کے سابق وزیر اعلیٰ کے نام پر رکھا گیا تھا۔ہمایوں کبیر نے کہا کہ بنگال کے عوام نے 'بدعنوان حکومت' کو اقتدار سے باہر کر دیا ہے، جس کے لیے وہ عوام کے شکر گزار ہیں۔وہ اپنے گلے میں دو شناختی کارڈ لٹکائے اسمبلی پہنچے اور الیکشن کمیشن سے اپیل کی کہ خالی ہونے والی نشستوں پر جلد از جلد ضمنی انتخابات کرائے جائیں۔

Source: PC-sangbadpratidin