اسپتال نے چھٹی دے دی مگر بیٹا معذور ماں کو گھر لے جانے کو تیار نہیں،دعویٰ: 'بل تو بھر رہا ہوں، مسئلہ کیا ہے؟

کولکاتا7جنوری :ایک معمر خاتون گزشتہ 10 ماہ سے اسپتال میں زیرِ علاج ہیں۔ پیر کی ہڈی ٹوٹ جانے کی وجہ سے وہ معذور ہو چکی ہیں اور خود سے ہلنے جلنے کے قابل بھی نہیں ہیں۔ ایسی حالت میں بیٹا اپنی ماں کو اسپتال سے گھر لے جانے کو تیار نہیں ہے۔ وہ اسپتال کے اخراجات ادا کر کے اپنی ماں کو وہیں رکھنا چاہتا ہے۔ الزام ہے کہ ڈاکٹروں کے چھٹی دینے کے باوجود بیٹا اپنی ماں کو گھر نہیں لے گیا، بلکہ الٹا اس نے اس معاملے کے حل کے لیے اسپتال انتظامیہ کے خلاف ہیلتھ کمیشن سے رجوع کر لیا ہے۔ کولکتہ کے رہائشی امت بھادری نے اپنی والدہ کو 3 فروری 2025 کو بالی گنج کے ایک اسپتال میں داخل کرایا تھا۔ ان کی ران کی ہڈی ٹوٹ گئی تھی اور ساتھ ہی بڑھاپے کی دیگر بیماریاں بھی تھیں۔ اسپتال انتظامیہ کا کہنا ہے کہ مریضہ کا علاج مکمل ہو چکا ہے اور انہیں گھر لے جایا جا سکتا ہے، اسی لیے انہیں ڈسچارج کر دیا گیا تھا۔ تاہم، اہل خانہ انہیں لے جانے پر راضی نہیں ہیں۔ انتظامیہ کا دعویٰ ہے کہ اس طرح ایک بیڈ گھیرے رکھنے کی وجہ سے وہ دوسرے ضرورت مند مریضوں کو داخل نہیں کر پا رہے۔

Source: PC- anandabazar