ہائی کورٹ کے حکم سے منسوخ ہونے والے کسی بھی او بی سی سرٹیفکیٹ کو استعمال نہیں کیا جا سکتا

کولکاتا یکم جنوری : ایس آئی آر (SIR) کے کام میں ہائی کورٹ کے حکم سے منسوخ ہونے والے کسی بھی او بی سی سرٹیفکیٹ کو استعمال نہیں کیا جا سکتا۔ ریاست بھر میں ایس آئی آر کی سماعت کا عمل جاری ہے، اور اسی دوران او بی سی سرٹیفکیٹس کے حوالے سے کمیشن نے یہ اہم ہدایت جاری کی ہے۔ حال ہی میں ایک کیس کی سماعت کے دوران کلکتہ ہائی کورٹ نے الیکشن کمیشن آف انڈیا کو یہ فیصلہ کرنے کی ہدایت دی تھی کہ آیا ایس آئی آر دستاویز کے طور پر او بی سی سرٹیفکیٹ کی کوئی قانونی حیثیت ہوگی یا نہیں۔ اس کے بعد کمیشن کا یہ حکم انتہائی معنی خیز مانا جا رہا ہے۔ چیف الیکٹورل آفیسر کے دفتر کے ذرائع کے مطابق، اس حوالے سے ہدایات تمام ضلع مجسٹریٹس اور ڈسٹرکٹ الیکشن آفیسرز (DEO) کو بھیج دی گئی ہیں۔ جس میں واضح کیا گیا ہے کہ وہ تمام او بی سی سرٹیفکیٹس جو مارچ 2010 سے مئی 2024 کے درمیان جاری کیے گئے تھے اور جنہیں ہائی کورٹ کے حکم سے منسوخ کیا گیا ہے، انہیں ایس آئی آر کے کام میں استعمال نہیں کیا جا سکے گا۔ کمیشن نے انتخابی افسران کو اس معاملے پر خصوصی نظر رکھنے کی ہدایت بھی دی ہے۔ یاد رہے کہ کلکتہ ہائی کورٹ کے جسٹس تپوبرت چکرورتی اور جسٹس راج شیکھر مانتھا کے ڈویڑن بنچ نے مارچ 2010 کے بعد جاری کردہ او بی سی سرٹیفکیٹس کو منسوخ کرنے کا حکم دیا تھا۔ لیکن تعلیم اور ملازمت کے مواقع کے علاوہ، مغربی بنگال میں ووٹر لسٹ کی خصوصی تصحیح (SIR) کے لیے بھی ان او بی سی سرٹیفکیٹس کو بطور دستاویز استعمال کیا جا رہا تھا۔ حال ہی میں اس کے خلاف کلکتہ ہائی کورٹ میں مقدمہ دائر کیا گیا تھا اور اپیل کی گئی تھی کہ او بی سی سرٹیفکیٹس کو ایس آئی آر کی دستاویزات سے خارج کیا جائے۔ اس کیس کی سماعت کرتے ہوئے جسٹس کرشنا راو نے ہدایت دی تھی کہ الیکشن کمیشن آئندہ 7 دنوں کے اندر مناسب وجوہات بتاتے ہوئے فیصلہ کرے کہ مارچ 2010 کے بعد جاری کردہ او بی سی سرٹیفکیٹس قابلِ قبول ہیں یا نہیں۔ اس کے بعد کمیشن نے نوٹیفکیشن کے ذریعے واضح کر دیا کہ ہائی کورٹ کے حکم سے منسوخ شدہ کوئی بھی او بی سی سرٹیفکیٹ استعمال نہیں کیا جا سکے گا۔

Source: PC- sangbadpratidin