حلف برداری کے اسٹیج پر مودی نے ماکھن لال سرکار کے پاوں چھو کر آشیرواد لیا؛

حلف برداری کے اسٹیج پر مودی نے ماکھن لال سرکار کے پاوں چھو کر آشیرواد لیا؛ کون ہیں یہ 98 سالہ ’جوان‘؟ بنگال میں بی جے پی حکومت کے پہلے وزیر اعلیٰ شبھیندو ادھیکاری کی حلف برداری کی تقریب بریگیڈ پریڈ گراونڈ میں منعقد ہوئی۔ اس تاریخی موقع پر بھارت کے وزیر اعظم نریندر مودی نے اسٹیج پر ایک ضعیف العمر بزرگ کے پاوں چھو کر انہیں سلام کیا۔ یہ بزرگ ماکھن لال سرکار تھے، جو اس لمحے جذباتی ہو گئے اور انہوں نے مودی کو گلے لگا لیا۔ 98 سالہ ماکھن لال بی جے پی کے بانی شیاما پرساد مکھرجی کے کشمیر سفر کے ساتھی تھے اور اس دوران جیل بھی کاٹی تھی۔ شیاما پرساد مکھرجی کی یادوں کو سینے سے لگائے انہوں نے برسوں بنگال میں بی جے پی حکومت کا خواب دیکھا تھا، جو اب پورا ہو گیا ہے۔ ماکھن لال کا تعلق شمالی بنگال کے شہر سلیگوڑی (ڈاب گرام، سوریا نگر علاقہ) سے ہے۔ وہ بی جے پی کے قیام کے وقت سے ہی سیاست میں سرگرم رہے ہیں۔وہ شیاما پرساد مکھرجی کے قریبی سیاسی ساتھیوں میں سے ایک تھے۔ جب 1952 میں شیاما پرساد کشمیر کی صورتحال اور ترنگے کے وقار کے لیے وہاں گئے تھے، تو ماکھن لال ان کے ساتھ تھے۔ اس تحریک کے دوران انہیں گرفتار بھی کیا گیا تھا۔ شیاما پرساد مکھرجی کا جیل میں ہی انتقال ہو گیا تھا، جبکہ ماکھن لال رہا ہو کر بنگال واپس آئے اور اپنی سیاسی جدوجہد جاری رکھی۔1980 میں بی جے پی کی تشکیل کے بعد، وہ دیناج پور، جلپائی گوڑی اور دارجلنگ کے تنظیمی کوآرڈینیٹر بنے۔ محض ایک سال میں انہوں نے 10 ہزار ارکان رجسٹر کیے اور سات سال تک ضلعی صدر کے طور پر خدمات انجام دیں، جو اس وقت کی تنظیم میں ایک بڑی کامیابی تھی۔ سابق وزیر اعظم اٹل بہاری واجپائی جب شمالی بنگال گئے تھے، تو وہ خاص طور پر ماکھن لال کے گھر گئے تھے۔ ان کے درمیان گہرے دوستانہ مراسم تھے۔ حلف برداری کی تقریب میں وزیر اعظم مودی سمیت این ڈی اے کے زیرِ اقتدار 21 ریاستوں کے وزراءاعلیٰ اور چوٹی کے لیڈران موجود تھے۔ ماکھن لال سرکار کو بطور خاص مدعو کیا گیا تھا۔ جب وہ اسٹیج پر آئے تو نریندر مودی نے خود آگے بڑھ کر انہیں شال پہنائی اور ان کا احترام کرتے ہوئے ان کے پاوں چھوئے، جس نے وہاں موجود ہزاروں لوگوں کے دل جیت لیے۔ 98 سال کی عمر میں بھی ان کا جوش و جذبہ کسی جوان سے کم نظر نہیں آ رہا تھا۔

Source: Social Media