گیا نیش کمار اس سے ناراض ہیں کہ ریاستی حکومت سپریم کورٹ کیوں گئی

کولکتہ: دہلی میں وزیر اعلیٰ ممتا بنرجی نے دعویٰ کیا تھا کہ چیف الیکشن کمشنر گیانیش کمار ان کی بات نہیں سننا چاہتے تھے۔ اب کولکتہ میں بھی ترنمول کانگریس کی جانب سے یہی الزام لگایا گیا ہے۔ ان کا دعویٰ ہے کہ گیانیش کمار نے نہ صرف ان کی بات نہیں سنی بلکہ ان پر چیخے بھی۔ ترنمول کے وفد کے مطابق، الیکشن کمشنر اس بات سے ناخوش تھے کہ ترنمول نے اس معاملے کو عدالت میں کیوں چیلنج کیا۔ مغربی بنگال کے ایس آئی آر کے حوالے سے سپریم کورٹ میں کئی مقدمات زیر سماعت ہیں۔ خود وزیر اعلیٰ ممتا بنرجی بھی اعلیٰ عدالت میں اس کی وکالت کرنے گئی تھیں۔ پیر کے روز جب گیانیش کمار کولکتہ میں سیاسی جماعتوں کے ساتھ میٹنگ کر رہے تھے، تو انہوں نے بار بار سپریم کورٹ کے مقدمے کا تذکرہ کیا۔رپورٹ کے مطابق، جب کانگریس کے ساتھ میٹنگ ہو رہی تھی، تب بھی گیانیش کمار نے کہا: "آپ لوگوں نے سپریم کورٹ میں مقدمہ کیا ہے، اب ساٹھ لاکھ (لوگوں) کے مستقبل کے بارے میں مجھ سے پوچھ رہے ہیں؟" بعد ازاں ترنمول کے وفد سے بات چیت کے دوران بھی انہوں نے مبینہ طور پر غصے میں سپریم کورٹ کے حوالے سے آواز بلند کی۔ ترنمول کے وفد میں ریاستی وزراءفرہاد حکیم اور چندریما بھٹاچاریہ شامل تھے۔ میٹنگ کے بعد میڈیا سے بات کرتے ہوئے چندریما بھٹاچاریہ نے بتایا کہ کمشنر ان کی بات سننے کو تیار نہیں تھے اور الٹا ان پر چیخنے لگے۔ چندریما کے مطابق، گیانیش کمار نے بار بار یاد دلایا کہ وہ سپریم کورٹ گئے ہیں۔چندریما بھٹاچاریہ نے صحافیوں سے کہا: "مجھ سے کہا گیا کہ آپ لوگ تو سپریم کورٹ گئے ہیں... کیوں نہیں جائیں گے؟ یہ ہمارا حق ہے۔ ہم عوام کے لیے گئے ہیں۔ ہم سپریم کورٹ گئے ہیں، اور اچھا کیا ہے۔" چندریما کا مزید کہنا تھا کہ اگر سب کچھ سپریم کورٹ میں ہی ہے، تو پھر ہمیں بلایا ہی کیوں گیا؟ اگر بلایا ہے تو بات سننی ہی پڑے گی۔

Source: PC- tv9bangla