جنگلی بھینس کے حملے میں خاتون مزدور ہلاک

جنگلی بھینس کے حملے میں خاتون مزدور ہلاک جلپائی گوڑی کے ناگراکاتا بلاک میں واقع بامنڈانگا چائے کے باغ میں گھاس کاٹنے کے دوران بائسن (جنگلی بھینسے) کے حملے میں ایک خاتون مزدور ہلاک ہو گئیں۔ اس واقعے کے بعد پورے علاقے میں خوف و ہراس پھیل گیا ہے۔ پولیس ذرائع کے مطابق متوفی خاتون کی شناخت 56 سالہ ساوتری کاوار کے طور پر ہوئی ہے، جو بامنڈانگا چائے کے باغ کے ماڈل ولیج علاقے کی رہائشی تھیں۔ وہ اپنے پالتو مویشیوں کے لیے گھاس کاٹنے کی خاطر دیگر خواتین کے ساتھ ڈائنا جنگل سے متصل چائے کے باغ کے علاقے میں گئی تھیں۔ گھاس کاٹنے کے دوران اچانک ڈائنا جنگل سے ایک بائسن باہر نکل آیا۔ بائسن کو دیکھ کر باقی خواتین تو اپنی جان بچانے کے لیے وہاں سے بھاگ گئیں، لیکن ساوتری دیوی خوف کے مارے وہیں سن رہ گئیں۔ بائسن نے اپنے سینگوں سے ان کے پیٹ اور سینے پر زوردار حملہ کیا، جس کے نتیجے میں وہ کئی فٹ دور جا گریں اور موقع پر ہی دم توڑ دیں۔ بائسن کے جنگل کی طرف واپس چلے جانے کے بعد دیگر خواتین نے گاوں واپس آکر واقعے کی اطلاع دی۔ خبر ملتے ہی ڈائنا رینج کے محکمہ جنگلات کے اہلکار اور ناگراکاتا تھانہ کی پولیس فوری طور پر جائے وقوعہ پر پہنچی۔ لاش کو تحویل میں لے کر سلکاپاڑہ دیہی اسپتال منتقل کیا گیا، جہاں ڈاکٹروں نے باضابطہ طور پر ان کی موت کی تصدیق کر دی۔

Source: Social Media