گیس کی قیمتوں میں اضافے اور ایندھن کے بحران پر ممتا سڑکوں پر، پیر کو کالج اسکوائر سے ڈورینا کراسنگ تک مارچ

کولکاتا12مارچ :گیس کی قیمتوں میں اضافے اور ایندھن کے بحران کی وجہ سے پیدا ہونے والی 'انتشار' کی صورتحال کے لیے مرکز کو ذمہ دار ٹھہراتے ہوئے وزیر اعلیٰ ممتا بنرجی سڑکوں پر اتر رہی ہیں۔ ترنمول کانگریس کی سربراہ نے 16 مارچ، پیر کو ایک عظیم الشان احتجاجی مارچ کی کال دی ہے۔ یہ مارچ شام 4 بجے کالج اسکوائر سے شروع ہو کر ڈورینا کراسنگ پر ختم ہوگا۔ ممتا بنرجی کا الزام ہے کہ موجودہ حالات مرکز کی غفلت کا نتیجہ ہیں۔ ان کا کہنا ہے کہ جنگ شروع ہوئے کافی وقت گزر چکا ہے، لیکن اس کے باوجود مرکزی حکومت نے کوئی احتیاطی تدابیر اختیار نہیں کیں اور ہاتھ پر ہاتھ دھرے بیٹھی رہی۔ انہوں نے کہا کہ گیس ہر انسان کی بنیادی ضرورت ہے اور آج جو بحران پیدا ہوا ہے، اس کی مکمل ذمہ دار مرکزی حکومت ہے۔ وزیر اعلیٰ نے یہ الزام بھی لگایا کہ مرکز نے کسی پیشگی تیاری یا متبادل منصوبے کے بغیر گیس بکنگ کے لیے 25 دن کا نیا اصول نافذ کر دیا ہے، جس سے عام لوگوں کی مشکلات اور تشویش میں مزید اضافہ ہوا ہے۔ مغربی ایشیا اور عرب دنیا کی جنگ دوسرے ہفتے میں داخل ہو چکی ہے، اور جیسے جیسے وقت گزر رہا ہے، اس کے اثرات بھارت سمیت پڑوسی ممالک میں پھیل رہے ہیں۔ سب سے بڑا مسئلہ عالمی سطح پر تیل کی سپلائی کا ہے، کیونکہ دنیا بھر میں تیل کی ترسیل کا ایک بڑا حصہ اہم بحری راستے 'آبنائے ہرمز' کے ذریعے ہوتا ہے، جو جنگ کی وجہ سے بند ہے۔ ایندھن کی فراہمی کا راستہ مکمل طور پر بند ہونے سے مختلف ممالک میں ایندھن کا بحران پیدا ہو رہا ہے۔ ترنمول سپریمو ممتا بنرجی نے سوال اٹھایا ہے کہ مرکز نے تمام پہلووں پر غور کیے بغیر 25 دن سے پہلے بکنگ نہ کرنے کا اعلان کیوں کیا؟ ملک میں گیس کا کتنا ذخیرہ موجود ہے، اسے واضح کیوں نہیں کیا گیا؟ انہی سوالات کے ساتھ وہ احتجاج کے لیے میدان میں اتر رہی ہیں۔

Source: PC- sangbadpratidin